Bandièra01 1180x150: Comuna de Tolosa

Actualitats

Un tolosan ultradrechista engatjat al front d’Ucraïna amb los pròrusses

Victor Lenta, un jove tolosan ultradrechista, seriá a combatre sul front ucraïnés de Donetzk, engatjat dins una brigada pròrussa nomenada Brigada dels Volontaris de l’Oèst, segon d’informacions de La Voix du Midi, que cita d’informacions de Le Monde.
 
Segon aqueles jornals, Lenta e d’autres joves de tot l’estat francés fondèron un grop ultradrechista nomenat Unitat Continentala (Unité Continentale), e foguèron fòrtament influenciats pel teorician politic rus Aleksandr Dugin, considerat lo Rasputin de Putin. Eles serián partits sul front ucraïnés per “combatre l’imperialisme de l’Union Europèa e de l’OTAN, per defendre las populacions russofònas de l’èst que la zòna de Kyiiv las a clarament agredidas”.
 
Victor Lenta èra pro conegut a Tolosa, bòrd que foguèt mes en examen per l’afar de la brutala agression contra un estudiant chilen. Èra un dels quadres del Blòc Identitari dins la Ciutat Mondina e codirector de las Joventuts Nacionalistas Revolucionàrias (JNR), que cinc de sos membres foguèron detenguts en relacion amb la mòrt del militant antifaissista Clément Méric. Las Joventuts Nacionalistas son la filiala del grop d’ultradrecha de l’Òbra Francesa (Œuvre Française).
 
Lenta èra estat militar del 3n regiment paracasudista d’infantariá de la marina, mas lo renvièron de l’armada per aver participat a l’incendi d’una mosqueta a Colomièrs en abril de 2008 amb lo groposcul neonazi Languedoc War (Lengadòc-Guèrra), segon çò que publiquèt en 2008 lo jornalista Frédéric Haziza dins son libre Vol au-dessus d’un nid de fachos (Vòl al dessús d’un nis de faissistalha). Cal remarcar totun que Lenta aviá començat una procedura per difamacion contra aquel jornalista.
 
Dins aqueste vidèo, que lo publiquèt la television russa Novorossiia, Victor Lenta explica lo sens de son engatjament. El es lo mostachut a drecha.
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

BOURDON Pau
8.

#6 Non, çò qui ei un argument fascista qu'ei d'acabar un comentari en disent "argument invalid".

  • 2
  • 9
Terric Lausa Quilhan
7.

#5 Òc que cambiariá quicòm. Cambiariá que seriá un ultradreitista occitanista (aquestes sabi pas solament s'existisson). Aquí çò que cambiariá. Mas es pas lo cas. Aqueste individú es un ultradreitista francista.

  • 10
  • 3
Antipunt
6.

#5 Acabar un argument en disent "punt" (o "fin de la discussion") es un comportament faissista.

  • 5
  • 11
BOURDON Pau
5.

"Aqueste òme es un ultradreitista mas de l'ultradreita francesa e francista. Las siás referéncias son las del francofanatisme de conquèsta." E s'èra de l'ultradreta occitana e occitanista, e cambiaré quauquarren ? Qu'ei un fascista, punt.

  • 9
  • 6
BOURDON Pau
4.

Membre de las Joentuts Nacionalistas Revolucionàrias o de las Joentuts Nacionalistas ? N'ei pas briga parièr, que s'ageish de duas organizacions qui n'an pas arren a véder. Que's deu agir de las Joentuts Nacionalistas, puishque las JNR (dont los membres n'èran pas tan joens) n'èran pas arren mei que lo servici d'ordi de Serge Ayoub e de la soa "Troisième Voie".

  • 0
  • 0

Escriu un comentari sus aqueste article