Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaBrinholenc

Sauvar lo Castelàs de Forcauqueiret

Lei trabalhs de restauracion dau monument son estats abandonats per de rasons economicas. Se tracta d’un castèu dau sègle XII en grèu estat de degradacion

| SombreSanglier
L’associacion Eiretatge, qu’a per tòca de revalorizar e promòure la cultura occitana en Provença, a lançat una peticion en linha per sauvar lo Castelàs de Forcauqueiret (Brinholenc), castèu inscrich en 1966 entre lei monuments istorics.
 
Au mes de genier de 2014, après de fòrtei pluejas, lo darrier vestigi de la glèisa dau castèu (la ganda vòuta) s’es afondrat. D’autrei degradacions meton lo sit en grand perilh. Lo Castèu de Forcauqueiret, una fortalesa medievala dau sègle XII, es la mai impausanta dau parçan, es encuei laissada a l’abandon. De trabalhs de restauracion son pasmens estats fachs (per l’associacion ASER dins leis annadas 90) mai la comuna de Forcauqueiret, per rasons de budget, a pas seguit aqueste bèu projècte. Despuei dètz annadas, lo sit retomba en roïna. Lo castelàs poiriá devenir un sit toristic d’una granda importància per l’economia locala mai tanben un sit culturau fòrça interessant per la populacion dau país.
 
Una peticion pòt èstre signada en linha per interpelar leis elegits mai tanben lei divèrs responsables locaus, departamentaus e regionaus, e per qu’un programa de sauvagàrdia siá engatjat rapidament e durablament per fin de sauvar Lo Castelàs, aut luec istoric de Var. Pensam qu’i a urgéncia. L’associacion a ja fach seguir de nombrós corriers ais estructuras competentas.
 
 
 
 
Sebastian Zuber
 
 
_____
Lo liame per signar la peticion: http://www.petitions24.net/sauvons_le_castellas_de_forcalqueiret

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article