Bandièra01 1180x150: Comuna de Tolosa

Actualitats

Los Amics de Jornalet: un bilanç

| Gabor Dvornik
Fa ja un an que l’associacion Los Amics de Jornalet existís, e despuèi l’anonci oficial de nòstra creacion, que permetèt de bandir nòstras activitats, fa dètz meses, cresi tan legitim coma important de far lo bilanç public de nòstra activitat, dins las paginas de Jornalet, que nòstre jornal en linha es la rason d’èsser de nòstra pichona organizacion.

D’en primièr, vòli grandmercejar los 50 sòcis per lor ajuda generosa, amb una mençon especiala, pr’amor de lors contribucions excepcionalas, per lo movement Libertat e per En Hadi Eckert… que nos legís despuèi Iemèn! Gràcias a totes vòstres escotissons, vòs pòdi presentar aqueste bilanç financièr, realizat per nòstre clavaire Terric Lausa:

PRODUCHES:
Escotissons: 1 000,00 èuros (50 sòcis)
Donacions: 535,00 èuros
Total produches: 1 535,00 èuros
 
CARGAS:
Còstes bancaris: 25,70 èuros
Publicacion Jornal Oficial: 44,00 èuros
Còstes postals: 53,75 èuros
Donacions a JORNALET: 1 100,00 èuros
Total cargas: 1 223,45 èuros
 
Resultat: 311,55 èuros (En banca = 191,55 èuros / En cors = 120,00 èuros)
 

Coma o podètz constatar, nòstre compte es en equilibri, e o donam gaireben tot a Jornalet, levat de despensas de foncionament imprescindiblas (Jornal Oficial, còstes bancaris e postals; per vos mandar la letra de benvenguda, lo pegasolet e la carta de sòci).

Bensai los 1 100 èuros vos semblan una bèla soma, mas cal recordar que l’albergatge e la mantenença de vòstre jornal en linha còstan 1 400 èuros per an. Doncas, n’i auriá pas pro per o pagar tot. Tanben, sèm encara luènh de poder permetre a Ferriòl Macip d’aver un salari per son activitat enòrma de director. Avèm adreiçadas de demandas de subvencions a de collectivitats territorialas occitanas de l’estat francés mas, quand accèptan de nos respondre, quand nos dison pas que ne fan ja pro per la cultura occitana ni nos repròchan d’aver una sedença sociala exteriora a lor territòri precís, nos manca l’annada d’activitat necessària.

Los projèctes que capitan plan provòcan tostemps d’ostilitat o de gelosiá, mas me sembla que despuèi març de 2012, Jornalet a provat sa qualitat: cada jorn quatre articles d’actualitats nòus, de subjèctes variats, d’opinants de sensibilitats desparièras, d’editorials pertinents, per exemple. Es pas exagerat, çò’m par, de dire que vòstre jornal en linha es una referéncia indispensabla de la premsa occitana. Vos imaginatz, ara, que pòsca desparéisser?

Malgrat sa reüssida, Jornalet es fragil. Sèm ja 50 sòcis dels Amics de Jornalet que lo volèm sosténer? Òsca! Totun, es evident que vòstre jornal en linha s’amerita una apièja massissa de part de l’ensemble de l’occitanisme, quinas que sián nòstras tendéncias que tròp sovent nos devesisson. Sèm 50? E perqué pas 500?




Gerard-Joan Barceló,
president dels Amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Nicolau Rei Bèthvéder Sent Lis
1.

Vos feliciti ende la vòsta accion. Un projècte = budgèt. Mos hè besonh le jornalet.

  • 16
  • 1

Escriu un comentari sus aqueste article