Bandièra01 1180x150: Comuna de Tolosa

Actualitats

Quatre cases de chikungunya a Montpelhièr

Aquesta nòva contaminacion fa témer lo desvolopament del virus en Occitània

| Public Health Image Library
Quatre personas aurián contractat lo chikungunya a Montpelhièr. Segon d’informacions de France 3, los infectats aurián pas meses los pès dins cap de region contaminada per la malautiá.
 
Lo chikungunya es una fèbre tropicala rara provocada per un virus, que de moissals infectats lo transmeton als umans. La malautiá se tròba en Africa e Asia, mas dins los darrièrs decennis s’es propagada en America e Euròpa. En 2007 se notifiquèt la primièra flambada de chikungunya a Ravena (Emília-Romanha, Itàlia). En Occitània i aguèt dos cases en 2010 a Frejús (Esterèu). Ongan an quitament trobat d’especimèns del moissal que transmet lo virus dins la region de Bordèu.
 
A l’ora d’ara i pas cap de tractment disponible, mas la malautiá es pas mortala e las personas se remeton en general en doas setmanas, après de grandas sofrenças.
 
Aquesta nòva contaminacion fa témer lo desvolopament del virus en Occitània, un scenari que lo prevesián fa longtemps las autoritats sanitàrias. Segon Le Figaro, una campanha de netejatge dins lo quartièr dels quatre malauts se lançarà lèu-lèu. Las autoritats medicalas son a trabalhar per arrestar çò que poiriá venir una epidemia. “Se se fa pas res, la densitat de moissals dins lo sud de França es tot plen sufisenta per que i pòsca aver una epidemia”, çò ditz a Le Figaro l’epidemiològ Alexis Armengaud. “Es dins los primièrs jorns qu’o cal tot arrestar”, çò insistís.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article