Bandièra01 1180x150: Comuna de Tolosa

Actualitats

Lo govèrn espanhòl fa suspendre la lei catalana de l’energia

La lei prevesiá que se poguèsse pas copar lo servici per impagament pendent los meses d’ivèrn a las familhas pauras. Madrid considèra que la lei catalana discrimina las autras autonomias

Lo govèrn espanhòl a presentat un recors al Tribunal Constitucional contra la lei catalana de la pauretat energetica, que prevei d’empedir la copadura de fornidura d’energia a las personas pauras pendent los meses d’ivèrn. Lo tribunal espanhòl a acceptat lo recors per çò que la lei es en suspension; e aital las companhiás auràn drech de retirar la fornidura als que paguen pas.
 
Lo govèrn espanhòl critica la lei catalana, que ditz que vulnèra sas competéncias e que discrimina los ciutadans de las autras autonomias. Al delà, encara segon lo govèrn d’Espanha, “la manca d’intradas dins las entrepresas d’electricitat afectariá los autres consumaires espanhòls”.
 
De son costat, lo govèrn de Catalonha defend que sa lei es legala e que viòla pas cap de competéncia estatala. Al delà, explica que l’ivèrn passat 500 familhas en situacion de vulnerabilitat aculhiguèron ben lo decret qu’aquela lei rendiá possible.
 
En prevesent qu’aqueste ivèrn las companhiás poiràn barrar la fornidura als que pagaràn pas, lo govèrn de Catalonha pensa d’activar un fons de capital public e privat per pagar las facturas energeticas d’aquelas familhas pendent l’ivèrn.
 
 
Cada consumaire deu pagar 630 èuros de mai a la factura del gas
 
De mai, lo govèrn espanhòl decidiguèt d’indemnizar l’entrepresa ACS amb 1,35 miliard d’èuros pel desmantelament del sit de gas sosmarin, nomenat projècte Castor, que provoquèt de sismes, segon çò que rapòrta Ara.
 
Aquela indemnizacion, la cargarà sus la facturas del gas dels consumaires de l’estat espanhòl pendent 30 ans. Amb aquò, cada consumaire aurà pagat 630 èuros e al total 4,73 miliards d’èuros, qu’es lo còst de l’indemnizacion mai los interèsses bancaris.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
2.

"discrimina los ciutadans de las autras autonomias": amb de rasonaments aital, d'autonomia n'i a pas ges. Es coma "l'égalité" a la francesa qu'escafa la libertat.

  • 4
  • 0
Joan Francés Blanc
1.

L'estat espanhòl es en avança sus l'estat francés dins son metòde de financiar per las talhas (que lo gas n'es una) las entrepresas privadas. Mas lo govèrn actual trabalha per far disparéisser aquel retard...

  • 5
  • 0

Escriu un comentari sus aqueste article