Bandièra01 1180x150: Comuna de Tolosa

Actualitats

Rugbi XIII: lo portanèl de l’esperança

Los Pols an una partida decisiva de jogar divendres de ser contra Escòcia

Lo reviscòl inacabat dels Pols
 
A Albi, mai de 5 000 espectators sostenguèron aqueste dissabte lo XIII de França contra Galas. Aqueste còp, los Blaus perdèron pas temps per marcar lor territòri. Tre la quatrena minuta, l’alièr de Carcassona, Clamenç Soubeyras, puntava lo primièr ensag dels Pols. Se los galeses replicavan, tres autres ensages anavan confortar la dominacion dels locals e, coma Marginet passèt las transformacions, la marca montèt a 24-6 a la pausa. A l’ora de jòc, los Blaus n’èran a lor seten ensag de la vesprada e menavan 42-12. Mas aquí s’arrestèron de quichar, se metèron al nivèl de l’adversari que tornèt a 42-22.
 
Aquela baissa de ritme complica las causas pels Pols. Aquesta mitat de mièg temps mancada lor impausa d’anar batre divendres de ser los escoceses de 18 punts: caldrà èsser dins la partida de la primièra a la darrièra segonda per ganhar al campionat europèu e jogar las Quatre Nacions de 2016. Los escoceses, acrocats dins lo primièr temps, ont res foguèt marcat, s’impausèron en Irlanda dins lo segond temps: 25-4.
 

Los Kiwis anóncian la color
 
A Brisbane, se teniá la primièra jornada de l’edicion 2014 d’aqueste Torneg de las Quatre Nacions. Los angleses se deguèron emplegar per batre los samoans 32-26. Dins la segonda partida, una fòrta formacion neozelandesa prenguèt lo pas sus una Austràlia rejovenida: 30-12. Per la segonda jornada, aqueste dissabte 1r de novembre, la Nòva Zelanda reçauprà Samoa a Whangarei e lo rescontre Austràlia-Anglatèrra se debanarà a Melbourne dimenge.
 

Represa del campionat
 
Una jornada de campionat d’Elèit 1 es programada aquesta dimenjada. Son previstes per dimenge de vèspre los rescontres: Avinhon-Limós, Vilanuèva-Palau, Lesinhan-Tolosa e, a Sant Estève, se los Dragonets demandan pas lo repòrt de la partida en rason de sos internacionals, la partida entre los catalans e lo cap de fila Carcassona.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article