La National Geographic Society, en collaboracion amb ITB Berlin, a instaurat ongan un nòu guierdon per soslinhar “las companhiás, organizacions e destinacions qu’an emprés lo camin d’una transformacion positiva de l’indústria del torisme, per mostrar als caps e als visionaris en torisme sostenable las melhoras practicas”. Son los World Legacy Awards e venon de ne seleccionar los quinze finalistas dins cinc categorias. La Val d’Aran i es dins la seccion de las destinacions.
 
“Èster ena finau d’ua des categories des National Geographic World Legacy Awards autrege mès qualitat ara nòsta destinacion toristica, donques que hègem concurréncia a un totau de 150 candidats”, çò a declarat la conselhièra del torisme, del comèrci e del consume del Govèrn d’Aran, Anna Díaz. “S’arreconeish eth trabalh de toti es sectors implicadi en torisme dera Val d’Aran, e era certificacion Biosphere Destination que siguec concedida pera UNÈSCO mos place en mapa internacionau de destinacions toristiques”, çò a apondut la conselhèra aranesa.
 
La jurada del guierdon remarca que la Val d’Aran “es una destinacion toristica populara d’ivèrn e d’estiu ont se trabalha fòrça per la proteccion de l’istòria culturala e naturala amb lors abitants, per salvagardar la cosina e las tradicions, e amb de cercaires sus la fauna, per protegir d’espècias coma l’ors brun”.
 
Dins la meteissa categoria de destinacions i a tanben l’Ofici de Torisme d’Aruba (Cariba) e lo programa GreenPath de Delaware North Yosemite (Estats Units).
 
Lo ganhant de cada categoria s’anonciarà en una ceremònia a Berlin al començament de març de 2015. De mai, National Geographic (coma revista) consagrarà de reportatges als ganhants e finalistas, e doncas ne farà un sus aquel país occitan.