Bandièra01 1180x150: Comuna de Tolosa

Actualitats

Rugbi XIII: la Nòva Zelanda contra Austràlia en finala de las 4 Nacions

Nòva Zelanda-Australia: òm ne torna totjorn demandar!
Nòva Zelanda-Australia: òm ne torna totjorn demandar!
Una dimenjada de novembre sens suspresa: la finala de las Quatre nacions opausarà la Nòva Zelanda e Austràlia e Carcassona perseguís sa sèria de victòrias.
 
Los angleses i arriban pas
 
Dissabte, dins l’estadi cobèrt de Dunedin, Anglatèrra-Nòva Zelanda èra decisiu per la qualificacion en finala del Torneg de las Quatre Nacions. Los jogaires de la Ròsa se fasián susprendre sus la primièra candela negra tre la segonda minuta (ensag de Nightingale). Alara, se lançavan a totas fòrças, dominavan e prenián l’avantatge suls ensages de sos dos alièrs: 8-6 (Hall a la 6a minuta e Charnley a la 25a). Mas, a la mièja ora, los Kiwis tornavan passar davant: 12-8 amb un segond ensag de Nightingale. A la represa, los neozelandeses confortavan lor avança (ensag de Vatuvei, 45a) e la darrièra realizacion de Ryan Hall (56a; lo seisen ensag d’alièr de la partida!) empachava pas los Negres de se qualificar 16-14 per la finala de Wellington e los angleses de tampar las malas per montar dins l’avion del retorn!
 
Dimenge, s’imaginava qu’Austràlia, e mai rejovenida, anava aisidament prene l’avantatge sus Samoa. Efectivament, a la pausa, los Cangorós menavan 28-6 mas los Blaus se tornèron mobilizar e tornèron marcar. Se raprochèron a 32-18, mas la marca se conflèt amb dos ensages suplementaris dels australians: 44-18. Tròp d’indisciplina pòrta prejudici al jòc samoan, mas la formacion pòt èsser plan satisfaita de sa participacion al Torneg.
 
La finala de dissabte 15, a Wellington, serà un revenge de la finala de la Copa del Monde de l’an passat: “the best of the best battle”. Al primièr torn del Torneg, los neozelandeses ganhèron 30-12: de qué ne serà dissabte?
 
 
8 sus 8 per Carcassona
 
Dimenge, en campionat, Carcassona recebiá son vesin de Corbièras. Los Canaris faguèron un primièr mièg temps de fuòc: 30-0 amb cinc ensages de tria e d’escòla a la clau. Mas dins lo segond temps, los Singlars se reviscolèron; Cooper marquèt un ensag (49a), Gressèque repliquèt per una penalitat (52a), abans que los Verds e Blancs trapèssen de traucs dins la defensa locala e anèssen darrèr la rega tres còps en cinc minutas a l’ora de jòc. Un tombat de Gressèque (69a) estipulèt a l’esquipa de Corbièras que signariá pas un retorn fantastic. Marca finala: 32-20, e ueitena victòria de la sason per Carcassona.
 
Lo segond, Tolosa, anèt ganhar a Palau 36-26; Limós torna prene gost a la victòria: 36-16 contra Vilanuèva e, a Sant-Estève, Avinhon opausèt una seriosa contestacion als Dragonets abans de plegar 29-24. La dimenjada se dobrirà amb lo cim del campionat entre lo campion Tolosa e lo cap de fila Carcassona (dissabte 15, a las 3 e mièja del vèspre als Minims).
 
Las 3 autras partidas se debanaràn dimenge amb un Vilanuèva-Dragonets decisiu per la qualificacion dins la Pola dels Asses, lo dèrbi Limós-Lesinhan e Palau-Avinhon.
 
 
 
 
Alan Roch
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article