La Federacion Interregionala dels Mèdias Occitans (FIMÒC) ven d’inaugurar un nòu sit Internet. Sus www.fimoc.com se pòt trobar una presentacion de l’entitat, dels mèdias que ne fan partida e un fil d’actualitats. S’avètz mancat una cronica o una entrevista de la FIMÒC quinas que sián, un ligam Mixcloud es a disposicion per descargar o escotar en linha las darrièras cronicas, especialament las de Good Morning Occitània en podcast.
 
Tanben, i a de ligams cap al sit Palanca ont los mèdias s’escàmbian lors reportatges, entrevistas e fòtos.
 
Jornalet fa ben partida de la FIMÒC, qu’amassa tanben Vistedit (editor de La Setmana, Plumalhon e Papagai), Ràdio País, Ràdio Occitània, Ràdio Lengadòc Narbona, Paraulas en Òc, Ràdio Albigés, Ràdio Copa Santa [Radio Coupo Santo], Radio Périgueux e Radio Beckwith (una ràdio de las Valadas qu’a de programacion en occitan).
 
Lo trabalh comun que fasèm totes los mèdias federats dins la FIMÒC nos permet de dobrir de nòvas collaboracions entre mèdias.