Per l’onzena jornada del Campionat, los marcaires d’ensages se son arregalats dins unas partidas disputadas amb plan de vam e de nhac dissabte jos la pluèja e dimenge jol solelh.

Fin de sèria per Carcassona
 
Dissabte, Lesinhan anava desfisar lo campion als Minims. Lo temps e la pelena èran pas dels pus bèls. L’FCL, mercé al pè de Maxim Benausse, s’impausèt “a la quinzista”: los tolzans marquèron 3 ensages, los audencs solament dos, mas Benausse ajustèt a la nòta las doas transformacions, tres penalitats e dos tombats. Victòria dels Verds e Blancs: 20-16.
 
A Carcassona, la pluèja tombèt de contunh suls jogaires e los Dragonets, en cèrca de punts, se mostrèron mai valents e mai dinamics que lo cap de fila; Carcassona dominèt mas marquèt pas (mai d’un còp, de jogaires se faguèron metre sus l’esquina sens poder puntar darrèr la rega) e los catalans sapièron defendre e faire la diferéncia en concretizant quauquas accions: victòria sang e aur 19-16.
 
Dimenge, Vilanuèva confirmèt sas pretensions a integrar la pola bèla en faguent la corsa en cap long de la partida a Palau: 18-8 a la pausa e 34-20 a la còrna.
 
A Limós, dins una partida vodada a l’ofensiva, Avinhon mostrèt tot son vam dins un jòc a la man decabestrat amb lo mesclanha Arnaud en cap de fila, mas a la fin, lo jòc al pè del mèstre del jogar local Miquèl Murcià permetèt a sos companhs de marcar los ensages decisius per una corta victòria: 34-30.
 
Tant i a que la situacion per la qualificacion per la pola bèla s’esclaira pas: Carcassona e Tolosa ne seràn. Demòran doas plaças per quatre pretendents: Vilanuèva, Lesinhan, Dragonets e Limós.
 
 
Un dimenge important
 
Las quatre partidas de la dotzena jornada se debanaràn dimenge de vèspre. Vilanuèva ensajarà de prene lo pas sus Carcassona a l’estadi Max Rosièr per se raprochar de la qualificacion; Lesinhan reçauprà Palau; Tolosa serà a Avinhon; a Sant Estève, es una partida plan importanta que jogaràn Limós e los Dragonets. Los setzens de la Copa Lord Derby seràn tanben al programa amb d’afrontaments entre 12 esquipas d’elèit 2 e 4 de nacionala 1. Atal, la Liga de Rugbi Vilagalhenc-Aragon (Nacionala 1), que joguèt los quarts l’an passat, reçauprà la formacion d’elèit 2 de Lion. L’autra formacion audenca de nacionala 1, Ferrals de las Corbièras, reçauprà un autre pensionari d’elèit 2: Sent Gaudenç. En cap d’aficha d’aqueste torn de Copa: la partida Albi-Baó.
 
 
 
 
Alan Roch