Bandièra01 1180x150: Comuna de Tolosa

Actualitats

Suicidi d’una femna amb sas doas filhetas sus la via del tren

Dimenge passat una femna se suicidet amb sas doas filhetas de 2 e 3 ans en se metent jos un tren al Haugar (Gasconha Tolosana), segon çò que rapòrta La Dépêche. La femna, de 34 ans, que viviá a Castèlginèst (Tolosan), prenguèt sa veitura per anar fins al Haugar, ailà daissèt l’automobila e se placèt amb las doas drolletas sus la via del camin de fèrre. Un tren arribèt rapidament e moriguèron sul còp, e mai se lo menaire del tren frenèt d’urgéncia.
 
Las investigacions menadas pels gendarmas confirman la tèsi del suicidi, après aver trobat una letra qu’ela aviá escrich en explicant sa volontat de morir. Lo marit de la suicidària, paire de las doas drolletas assassinadas, recebrà tot lo sosten de las autoritats municipalas, segon çò que declarèt lo cònsol de Castèlginèst. L’òme deguèt èsser espitalizat e a besonh d’ajuda medicala per afrontar çò que s’es passat.
 
Per ara se sap pas çò que menèt aquela femna a far una causa tan terribla. La femna èra originària de Guadalope, aviá viscut dins la region parisenca abans de venir en Occitània e trabalhava en una gardariá d’enfants.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Danièl Tolosa
2.

#1
Las pauras dròllas aguèron pas la causida ... Trista istòria per tota aquela familha. Lo menaire del tren es per plànher el tanben. Deu èsser quicòm que de véser una femna amb sas dròllas sus la via ... Mas podèm pas arrestar un tren coma una veitura.
Arser tanben, mentre qu'arribava un TER, un camion italian demorèt immobilizat a un passage de nivèl de Montalban. Dison que i agut un trentenat de nafrats.

  • 5
  • 0
Cristian FORMENT AGEN
1.

Respecte a l'espiritualisme umanista, donc laïc que impregna la cultura occitana, cal vertadièrament díser que son estadas assassinadas las duas filhetas ?

  • 5
  • 2

Escriu un comentari sus aqueste article