Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaLanas e LabritShalòssa

Una jornada au Vielh Bocau contra lo projècte Salins de Landas

Debats, concerts, repaishs e expausicions per exprimir l'opausicion a l'installacion d'un siti d'estocatge deu gas

Airau estudiat per l'implantacion deus conductes de sau
Airau estudiat per l'implantacion deus conductes de sau | CNDP

Lo projècte d'EDF de cavar un siti d'estocatge deu gas naturau jos las comunas de Polhon e Mimbasta (Shalòssa) ne s'encontra pas shens que benvolenças. Fàcia ad aqueth projècte gigant, mantun actors locaus, elegits e collectius de ciutadans, s'amassan e organizan una jornada de luta doman (1èir d'abriu) au Vielh Bocau.


Un projècte titanesc
 
Après una purmèira fasa d'estudis preliminaris en 2009-2010, e un debat entamiat au mes d'abriu 2011 peu biais de la Commission Nacionala de Debat Public (CNDP), EDF sembla determinada per avançar. Pr'amor lo projècte es d'amplor: s'agís aquí de vueitar unas cavas josterranas de la sau que contenen, en i har víner aiga de mar, e en escampar la saumura produsida a la mar, a 1,5 km de la còsta. Après au mensh sheis ans d'òbras, son 600 milions de mètres cubes que diurén estar liberats de lor contingut, entà deishar EDF estremar gas naturau. En contrapartida de recetas fiscalas de 6 millions d'euròs, l'enterpresa privada poirà atau alimentar lo mercat locau, mès tanben har foncionar centralas termicas de produccion d'electricitat. 250 emplecs serén creats per l'òbra de construccion, e un aute trentenat serén mantinguts per l'espleitacion.
 

Un projècte mes en dobte
 
Mantun elegits locaus se son dejà opausats ad aqueth projècte: comunas que s'afirman francament contra (Moliets, Messanjas, Ossegòr, Vielh Bocau, Capberton, Sostons, Magesc), elegits que s'opausan clarament (Hervé Bouyrie, vice-president deu Conselh Generau de las Lanas e conse de Messanjas) o que demòran reservats (Henri Emmanuelli, president deu Conselh Generau de las Lanas); lo projècte ne hè pas briga unanimitat. Ad aqueths elegits se hornissen mantuna organizacions, que se juntan a l'entorn d'un siti web.
 
La jornada d'uèi au Vielh Bocau, entre debats, concerts, repaishs e expausicions, exprimirà l'opausicion d'una larga part de la poblacion locau au projècte d'EDF. Una manifestacion èra dejà estada seguida per 500 gents lo 22 de genèir, en seguir l'aperet de Surfrider Foundation.
 

Cranhénças per l'avenir ecologic deu parçan
 
Los arguments ecologistas an un grand resson demiei los opausants au projècte. Fau díder que las perspectivas expausadas per EDF pòden espaurugar. Per craunar aquera sèrva, 870 000 toneladas de sau serén escampadas a la mar cada an, en implicar una suber-salinizacion deu parçan. L'impacte suu litorau poiré estar hòrt, per la fauna e la flora marina, per los usatgèirs de las plajas, o per los quites espacis terrestres: zònas Natura 2000, napas freaticas o òbras de proteccion de las dunas e deu treit de còsta. Mei d'aquò, questions demòran quand a la seguretat deus sitis cavas, e quand aus eventuaus esboniments futurs. D'auta part, delà aqueras problematicas "localas", la question es pausada peu collectiu sus l'oportunitat d'apitar una estructura giganta d'estocatge de gas shens soscar mei sus l'avenir d'aquera energia que participa en plen a la formacion de l'efècte de sèrra. Mantuna questions que los participants de la jornada de uèi sajaràn d'i responder.

Pèir-Joan Masdiset

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Guilhèm Bearn
3.

Puta de projècte !

Un acabat de poeiri l'aire, que s'i cau har dab la tèrra e lo sòu : pensada sistemica.
En.hicar CO2 devath lo vitatge AOC de Juranson, que n'ei ua uata, de saloperia !

  • 0
  • 0
Tederic Merger Tonens
2.

Adishatz !
Ua remarca de lenga : pensi que cau diser "lo Bocau vielh"?
http://www.in-oc.org/fr/presentation-inoc/nos-services/langue/toponymie/48-liste-des-communes-des-landes-et-du-bas-adour
Siatz hardits ! Que sajarei de seguir l'aventura deu"Jornalet".

  • 0
  • 0
Jusep M. Reus
1.

Las bossas subterranias d'estocatge de gas sont pas perilhosas, doncs i a pas d'oxigèn au subsòl, és pas possible de se brular, ne pas explosionar. E lo problema de la sau lo mateish de las usinas de potabilisacion.

  • 0
  • 0

Escriu un comentari sus aqueste article