Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaPaís Marselhés

Los presonièrs de lei Baumetas an publicat sus Facebook de fòtos provocantas

D’enquèstas administrativa e judiciària se son dobèrtas

D’enquèstas administrativa e judiciària se son dobèrtas per determinar cossí qualques presonièrs de la preson marselhesa de lei Baumetas an pogut publicar sus Facebook de dotzenats de fòtos d’eles amb de faisses d’argent, de drògas e d’aparelhs electronics. Los sindicats an demandat un furn general, segon çò que rapòrta France Info.
 
Lo director de l’administracion penitenciària, Philippe Perron, diguèt que se dobriguèt ja una enquèsta quand se descobriguèt aquela pagina de Facebook. La pagina, qu’es ja estada barrada, se dobriguèt en defòra de la preson estant, mas se sap pas encara qual ne foguèt l’autor.
 
Los sindicats de foncionaris de presons denóncian de retalhadas dins lo personal, çò que permet, segon eles, que los presonièrs enfrangan las nòrmas amb impunitat totala.
 
La preson de lei Baumetas, pensada per una populacion de 1200 presonièrs e poblada per 1800 aperaquí, es estada protagonista de divèrses escandals. Fa mai de vint ans que s’acomolan las denóncias pel marrit estat igienic de lei Baumetas, sens que l’Estat aja pas jamai entreprés cap de mesura per o melhorar. Per exemple, en 2006, lo Conselh d’Euròpa qualifiquèt la preson marselhesa de “luòc fastigós”. I a un projècte per renovelar lo centre qu’auriá d’èsser alestit en l’an 2017, malgrat que sián pas paucas las voses que creson que la sola solucion n’es la demolicion.
 
En decembre de 2012, l’escandal arribèt al pus naut de l’estat francés. Lo Conselh d’Estat ordenèt una operacion de desratizacion massissa per netejar e desinfectar aquel centre penitenciari e ne melhorar las condicions igienicas. Segon lo vejaire del Conselh d’Estat, la situacion miserabla de lei Baumetas èra “illegala” perque atemptava contra las libertats fondamentalas dels presonièrs que i son embarrats.





Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article