Bandièra01 1180x150: Comuna de Tolosa

Actualitats

An identificat los tres suspèctes de l’atac de Charlie Hebdo

S’es organizat de recampaments espontanèus pertot en Occitània, dins l’estat francés e mai a l’estrange. Ara los dos suspèctes màgers son percaçats en Picardia

| Fabrice Valery
Las autoritats francesas capitèron ièr a identificar los presumits autors de l’atac de Charlie Hebdo. Se tracta de dos òmes, Cherif e Said Kouachi, dos fraires de 32 e 34 ans, un dels quals foguèt condemnat en 2008 per mandar de jihadistas en Iraq, e d’un jove de 18 ans, originaris de Gennevilliers (Nauts de Sèina), dins la banlèga parisenca. Lo jove es lo conhat d'un dels dos fraires, Cherif, que participèt a un reportatge d'investigacion de France 3 en 2005.
 
La polícia francesa lancèt ièr una operacion de mai de 500 agents per capturar los autors d’aquel atac del setmanièr satiric francés. E en particular, ièr de ser, una operacion del RAID —una fòrça especiala antiterrorista— se debanèt a Rems (Champanha).

Pendent la nuèch passada, lo suspècte pus jove se rendèt a la polícia. Los dos autres suspèctes fan l’objècte d’un avís de recèrca, e son percaçats en Picardia, près de la selva de Longpont.
 
Aperabans, los terroristas faguèron irrupcion ièr, dimars de matin, a la redaccion del setmanièr Charlie Hebdo en tuant un dotzenat de personas, dont cinc dessenhaires satirics celèbres: Cabu (Jean Cabut), Georges Wolinski, Charb (Stéphane Charbonnier), Tignous (Bernard Verlhac) e l’occitan Philippe Honoré. Tanben foguèron assassinats l’economista occitan Bernard Maris, l'organizaire de festenal occitan Michel Renaud, un corrector, una cronicaira psicanalista, un òme d'ostal,  e, en defòra de la còla del jornal, dos policièrs. Una camèra enregistrèt lo moment qu’un dels tuaires acabava de tuar un dels policièrs quand èra ferit al sòl. Aquel filmet, qu’a virat per lo Mond, lo volèm pas publicar dins lo Jornalet pel respècte de la dignitat de la persona tuada.
 
S’es organizat de recampaments espontanèus pertot en Occitània, dins l’estat francés e mai a l’estrange. A Tolosa, la polícia comptèt 10 000 personas, e de milierats de marselheses se son acampats al Pòrt Vièlh. Pertot se portava de bandieròlas amb l’inscripcion “Je suis Charlie” (“Soi Charlie”) e de numèros del setmanièr satiric.
 
Charlie Hebdo aviá recebut de menaças en 2012 perque aviá consagrat sa primièra pagina a las manifestacions dins lo mond musulman contra un filme que caricaturava lo profèta màger de l’islam, e tanben perque aquel meteis jornal n’aviá publicat de caricaturas. Un an abans, maitot òm aviá atacat la redaccion amb de coctèls Molotov en seguida de la publicacion d’un numèro especial amb una caricatura de Maomet.
 
La premsa occitanofòna, coma La Setmana o lo numeric satiric Manaset, tanben an mostrat lor sosten al setmanièr francés atacat. De jornals de tot lo Mond, coma lo catalan Vilaweb o lo flamenc Check Point, an fach lor omenatge a Charlie Hebdo en publicant los dessenhs dels caricaturistas assassinats, aqueles caricaturistas qu’aurián provocat l’ira dels assassins. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
2.

#1 Grandmercé de còr per aquest comentari que fai gaug, de verai.

  • 3
  • 0
Felip Martèl Montpelhier
1.

Felicitacions au Jornalet per sa reactivitat sus aqueu drama, tre ièr. Aquelos que se pausavan de questions sus son professionalisme an lor resposta.

  • 13
  • 0

Escriu un comentari sus aqueste article