Los autors presumits dau masèu a Charlie Hebdo, abatuts per la polícia pendent la presa d’ostatges de Dammartin-en-Goële, passèron sièis annadas de lor enfança en Lemosin. Puei se radicalizèron.

Chérif e Saïd Kouachi nasquèron a la debuta daus ans 80 a París. Orfanèus de pair, foguèron plaçats au Centre de las Monedieras de la Fondacion Pompidor a Trainhac (Montanha Lemosina), coma lor petit frair e lor sòr. I demorèron de 1994 a 2000. Chérif i passèt un CAP mai un BEPC d’ostalariá. Son frair s’orientèt vèrs l’electrotecnica, çò que lo menèt a Sant Junian (País de Vinhana). La premsa lemosina publiquèt daus testimoniatges de personas que los an coneguts.
 
“Degun a la Fondacion aviá de problèmas coma quilhs jòunes. Èran simpatics.” çò ditz Jean-Henry Rousseau, un camarada lor. “Ieu maitot veniá de París. I tornavan ensems. Qu’èran daus drollauds sens istòria, daus drollauds onèsts.” Patrick Fournier, responsable dau servici educatiu dau centre pendent 30 ans, i crei enquèra pas. “Sèm tots trucats per l’afar e perque coneissèm quilhs jòunes” çò ditz. “Avèm dau mau per imaginar que quilhs drollauds qu’èran perfiechament integrats pueschan deliberadament tuar entau.” Per Françoise Ronfet, lor professora de biologia au collègi de Trainhac, “èran febles psicologicament. Son estats transformats per rapòrt a çò qu’èran”.
 
Tornats a París, se radicalizèron. A partir de 2003, Chérif frequentèt una mosqueta ont rescontrèt Farid Benyettou, l’organizaire de la filiera dicha de Les Buttes-Chaumont. L’objectiu èra d’enviar daus jihadistas en Iraq. Mas vai pas aver l’ocasion d’i anar. Foguèt arrestat en 2005 e encarcerat a la preson de Fleury-Mérogis. Sa radicalizacion i contunhèt jos l’influéncia de Djamel Bheghal, un òme condemnat a 10 ans de preson per una temptativa d’atemptat contra l’ambaissada americana de París.   
 
Lo procès dau grop se faguet nonmàs en 2008. Passèron per daus amators. Chérif Kouachi foguèt condemnat a 3 ans de prison, e liberat perque los aviá ja fachs en detencion provisòria. Son frair Saïd faguèt nonmàs de la gàrdia a visda, coma se relevèt pas implicat dins lo grop.
 
Chérif semblava de venir mai seriós. Se maridèt e trabalhèt. Mas sa femna se metèt a portar lo niqab e laissèt son trabalh d’animatritz en gardariá d’enfants. En 2010, tornèt prene contacte coma Djamel Bheghal, qu’èra en residéncia susvelhada a Murat (Auvèrnha), e lo vesitèt mai d’un còp. I rescontrèron dos islamistas coneguts per los servicis de polícia: un salafista argerian e un orgarnizaire de filiera jihadista vèrs Afganistan. La mesma annada, foguèt suspectat de participar a la preparacion de l’evasion d’un daus islamistas responsables de l’atemptat de l’estacion d’RER Musée d’Oray en octòbre de 1995. Fauta de pròvas vai pas èsser condemnat.
 
Son frair Saïd, que demorava a Rems e trabalhava pas, s’èra maridat. Èra, segon sos vesins, un òme discret. Semblava de s’èsser radicalizat pendent daus viatges en Iemen. I auriá rescontrat daus islamistas e i auriá aprés lo manejament de las armas au près d’un membre d’Al Qaida.
 
Fasián partida de la lista de las personas que pòdon pas prene l’avion a destinacion o au despart daus Estats Units.
 
 
 
 
Maime Caillon