Bandièra01 1180x150: Comuna de Tolosa

Actualitats

Dubsmash: l’aplicacion poiriá lèu desaparéisser

Aprèp Instagram, Vine et Snapchat, una novèla aplicacion a facha son aparicion dins totas las botigas (stores) de la planeta. Sus totes los esmartfòns, aquela aplication es disponibla. Permet de se filmar en mòde autofòto (selfie) amb son mobil o sa tauleta numerica en se prenent per de personatges de filmes, de sèrias o de dessenhs animats e en tornar prene lors replicas mai cultas. Ai nommat... Dubsmash!
 
Aürosament qu’aquela aplicacion es sortida. Mercés a ela, pel primièr còp dempuèi l’escòla mairala, ai vist tant de mond dire amb lo mai grand seriós que “Dins lo mieu mond, i a pas que de pònis que manjan d’arcolans e que fan de cacais-parpalhòls”. Ai cercat e ai pas trobat de dobles (dubs) en occitan. Marrida novèla pels occitanistas, vos cal dire que dins vòstre mond i a pas que de pònis que fan de cacais-parpalhòls...
 
D’acòrdi, d’acòrdi, ieu tanben me soi prestada al jòc e ai descargada l’aplicacion. Mas, al fons, me pòdi pas empachar de me rendre compte que, dins un mond ont las gents se parlan de mens en mens, i a de joves que preferisson de se prene per Jacouille la Fripouille davant lor telefòn en disent “Es d’acòrdiiiiii”. Mas, coma mancan de dreches d’autor, l’aplicacion va benlèu èsser suprimida. Trista novèla pels que vòlon èsser los dobles d’ET aprèp aver fach meravilhosament ben “ET telefòn ostal” davant lor telefòn.
 
Coma totas las aplicacions, l’efièch se pèrd totjorn e, dins qualques meses, rars son los que publicaràn encara de dobles sus Facebook en disent “A la bona santat, los gusses!” Dubsmash vendrà obsolèt e una autra aplicacion fantastica apareisserà. La de Jornalet, benlèu?
 
 
 
 
Lucie Cazottes
Escolana de 1a en classa d’occitan al licèu de Galhac



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ocaponi
2.

Mercés Lucie per aquel article que manca pas d'umor e que pausa un agach critic e lucid sus aquelas apli fenomèn. Un plaser e una fiertat puèi de veire una liceana mieuna escriure en occitan per Jornalet. Una vocacion ven benlèu de nàisser , una grana semenada per la socializacion de la lenga que mercés a Jornalet ne podèm meissonar la frucha...

  • 3
  • 0
casa
1.

Es un pauc colhon, mai fa rire, aquela aplicacion ;)

  • 5
  • 0

Escriu un comentari sus aqueste article