Bandièra01 1180x150: Comuna de Tolosa

Actualitats

Rugbi XIII: Tolosa e Carcassona prenon los davants

Dissabte, Catalans e Lengadocians se tornavan trapar sus la pelena de Domèc
Dissabte, Catalans e Lengadocians se tornavan trapar sus la pelena de Domèc | Gerard Barrau

En aqueste temps de Candelosa, tot se met en plaça sus la planeta tretzista per que febrièr lance la palma ovala de pertot: segonda fasa del campionat en Occitània e Catalonha, represa de la Superliga, competicion internacionala dels clubs e debuta de la sason australiana.


Tolosa e Carcassona tustan d’entrada
 
Dissabte, se teniá la primièra jornada de la Pola dels Asses.
 
Sus sa pelena, Tolosa entamenèt la partida per tres ensages, mas Lesinhan se reviscolèt per menar 18-14 a la pausa; lo segond temps foguèt a l’avantatge dels campions: 32-22.
 
A Domèc, es jos la granissa que comencèt la partida entre Canaris e Dragonets. Lo primièr temps s’acabèt amb una marca d’egalitat 10-10. Mas dins lo segond temps, la melhora circulacion de la palma, lo rotlament eficaç dels pilars e segondas linhas, un Gressèque imperial a la manòbra e al jòc al pè, permetèron als locals de signar una victòria neta e clara: 44-22.
 
Dimenge, Tolosa anarà desfisar los Dragonets a Sant Estève e Lesinhan-ASC http://www.fcl13.fr/actualites-fcl-xiii/29-actualites/1457-ne-manquez-pas-le-repas-d-avant-match-fc-lezignan-as-carcassonne se jogarà al Molin davant las camèras de la Federacion que retransmetrà la partida en live streaming.
 
Dins las polas B e C, se constatèt un còp de mai la diferéncia bèla de nivèl entre Elèit 1 e Elèit 2 amb las victòrias de Limós sus Albi, 48-12, de Vilanuèva sus L’Escura, 34-18, d’Avinhon sus Baó, 36-8, e de Palau sus Vilafranca de Roergue, 40-12.
 
 
Represa en Superliga
 
Dijòus, amb Widnes-Wigan, se debanarà la primièra partida de la sason en Superliga: una annada clau amb lo passatge a dotze esquipas en Superliga 1, la qualificacion pels 8 primièrs e una pola de mescla amb 4 esquipas de Superliga 1 e quatre de Superliga 2 per determinar los participants a l’edicion 2016. Es un pauc complicat mas vos explicarem aquò a cha petit.
 
Divendres los Dracs catalans faràn un viatge bèl: cò dels campions, Saint Helens (partida de seguir sus Be In Sport). Dissabte, Warrington recebrà Salford. Las tres autras partidas se debanaràn dimenge: Castleford-Wakefield, Huddersfield-Hull FC e Hull KR-Leeds.
 
 
A 9 a Auckland
 
Dins l’autra part de la planeta, la sason començava amb un torneg a 9 de las esquipas d’NRL a Auckland; calguèt anar al punt d’aur per conéisser lo venceire: los Lapinons de Sud-Sydney, venceires 18-14 de las Làmias de Cronulla.
 
 
Los bons mots de Claudi-Armand Rabena
 
Mentre que Dimars Gras se sarra, voldriái saludar la memòria de Claudi-Armand Rabena (Limós-L’Aragon, 1913 – Limós, Flassian, 2004). Es l’autor de la famosa senténcia: “Lo XIII es una fèsta coma Carnaval, mas amb un sol confetti: la palma ovala”. Òm se soven tanben de sa parodia del cant tradicional de las fècas Vedrinas ont “Qu’es aquò que bronzina? Es lo motor de Vedrinas!” venguèt: “Qu’es aquò que tridòla? Es lo fiulet de l’arbitre. Qu’es aquò que trantòla? Es lo pichonet canari”. Assetat ivèrn coma estiu a la meteissa taula del Cafè del Comèrci, de l’ora matinièra del pichon cafè-armanhac a l’ora tardièra e fosca ont s’acaban los tresens mièges tempses, virava sens fin las paginas d’un jornal jaune en marmussejant coma una litània: “Lo XIII, aquò òc!”
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Ciutat
1.

Aquí a Mallorca lo rutby es practicament desconegut, mas magrada veire videos dels camps occitans quan canten Aquelas montanhes. E qu'es pas tan professional o quasi amater.

  • 1
  • 0

Escriu un comentari sus aqueste article