Filh del president del club de fotbòl Athletic Club Aiacciu Alain Orsoni, e nebot del militant nacionalista còrs assassinat Guy Orsoni, de qui prenguèt lo nom, lo jove còrs quitèt de s'alimentar lo 13 de febrièr per denonciar las condicions d'instruccion del sieu procès judicial. Orsoni es en preson per èsser restacat a dos afars d'assassinats en 2009. "La majoritat de las personas perseguidas pel meteis afar son estadas mesas en libertat provisòria, del temps qu'el demòra en preson" an dich los sieus avocats. Michel Tubiana a explicat lo sieu sosten en denonciar "los metòdes desleials de la JIRS de Marselha, jurisdiccion que privilègia sistematicament totes los procediments d'excepcion previstes pel còdi de procediment penal", a declarat l'avocata Camille Romani.


La setmana passada, Guy Orsoni èra estat portat a l'espital de Grassa (País de Grassa) e diluns tornèt a la preson de la meteissa vila après aver refusat la perfusion.