Polida dimenjada tretzista amb de partidas sarradas tanplan per la represa de la Superliga coma per la segonda jornada de la Pola dels Asses. Òm s’arregala!

Pas l’astre pels Dracs
 
Divendres, a Saint Helens, los Dracs daissavan Todd Carney en tribuna, nafrat a las cambas (elongacion). Lo centre Willie Tonga se trapèt lo nas dins la pelena, assucat al cap de 10 segondas de jòc e de son placatge sul segonda linha anglés. Aprèp una interrupcion del jòc d’un vintenat de minutas, sortissiá de la pelena sus un baiard. A la 5a minuta, Tomàs Bòsc èra victima d’un placatge de retardament (non sancionat) e, segon lo novèl protocòl en cas de nafradura al cap, deviá demorar un quart d’ora fòra jòc. Aquò empachava pas los Dracs de menar 7-6 a la pausa aprèp un ensag d’arpalhand de Pelissièr, la transformacion e un tombat de Bòsc. Mas, dins lo segond temps, lo freg realisme britanic se concretizava per tres ensages per metre los catalans a distància: 18-7.
 
Wigan, a 13 contra 12 pendent mai d’una ora a Widnes, se contentèt dijòus de l’egalitat 22-22. Dissabte, Warrington bat Salford 22-8. Dimenge, Wakefield ganha sul fil a Castleford: 24-22. E s’Hull KR pèrd a domicili contra Leeds 40-30, Hull FC se’n va ganhar a Huddersfield: 19-0. Dissabte, los Dracs recebràn los Tigres de Castleford (partida a 3 oras del vèspre a Brutus).
 
Es de notar la primièra partida dels U19 catalans qu’opausèron una brava resisténcia als joves de Saint Helens: 10-4 a la pausa per una desfaita amb la marca de 28-4.
 
 
Partida airejada al Molin
 
Se caliá plan vestir per seguir dimenge al Molin la partida entre Lesinhan e l’AE Carcassona. Los Canaris dobrissián la marca, mas Lesinhan fasiá pròva de realisme en concretizant sas incursions dins lo camp carcassonés per menar 18-4. Abans la pausa, l’AEC tornava a 18-14 abans de prene l’avantatge 28-18 a la represa. Mas Lesinhan se daissava pas faire e alinhava tres ensages per menar 34-28 a 5 minutas de la fin. Lo mesclanha jaune Borrèl trapava lo trauc, Gressèque transformava e la partida s’acabava amb una egalitat a 34 punts per cada esquipa: 6 ensages e 5 transformacions pels locals, 7 ensages e 3 transformacions pels vesitaires.
 
A Sant Estève, los Dragonets prenián los davants fàcia a Tolosa, 18-0 a la pausa, e mestrejavan lo retorn dels campions dins lo segond temps per ganhar 20-18.
 
Carcassona pren lo cap del classament amb 5 punts davant Tolosa, 4 punts, e Lesinhan e los catalans clavan lo tablèu amb 3 punts.
 
En pola B e C, solas las esquipas d’Elèit 1 an jogat: victòria de Palau contra Limós 38-24 e d’Avinhon contra Vilanuèva, clara e neta, 40-0.
 
 
Plaça als quarts de la Copa
 
Aquesta dimenjada se debanaràn los quarts de finala de la Copa Lord-Derby. A Sant Estève, Dragonets e tolzans se tornaràn trapar. Dèrbi engatjat a l’Agulha entre Limós e Lesinhan. Viatge de totes los dangièrs per Carcassona a Vilanuèva, mentre qu’Avinhon aurà las favors del pronostic per son desplaçament cò dels pensionaris d’Elèit 2: Sant Gaudenç.
 
 
 
 
Alan Roch