Bandièra01 1180x150: Comuna de Tolosa

Actualitats

D’“errors” grèvas de l’UE amb Ucraïna

Un rapòrt britanic critica que la marrida interpretacion que s’es facha de Russia a empedit una responsa energica

La crisi en Ucraïna a evidenciat en fòrça moments la feblesa d’una Union Europèa que saupèt pas res far per arrestar l’escalada del conflicte en aquel país après aprovar la casuda de l’anterior president, Viktor Ianukovych, e qu’en mai d’aquò es ostatge de las relacions economicas amb Russia.

Un rapòrt demolidor, publicat dissabte per la Comission dels Afars Europèus de la Cambra dels Lòrds del Reialme Unit, s’apondèt a las criticas envèrs l’UE dins la gestion del conflicte en Ucraïna. Segon lo president d’aquela comission, Christopher Tugendhat, Brussèlas e lo Reialme Unit an comés d’errors “catastroficas” perque intrèron coma de “somnambuls” en la crisi ucraïnesa e tot èsser victimas d’una vision positiva de Russia, segon la quala aquel país anava cap a la democracia, e aquò lor permetèt pas d’avalorar adeqüatament l’ambient d’abans la crisi. Segon lo rapòrt, la “marrida interpretacion” e la pauca coneissença de las questions relativas a Russia de part del Ministèri dels Afars Estrangièrs britanic e de sos omològs europèus empediguèron que se donèsse una “responsa amb autoritat”.

Mentretant, en una conferéncia de premsa conjoncha dissabte a París, la cancelièra alemanda, Angela Merkel, e lo president francés, François Hollande, tornèron far una crida per l’aplicacion entièra dels acòrdis de Minsk del 12 de febrièr per tal de metre fin al conflicte de l’èst d’Ucraïna, en de moments que lo succès de l’ofensiva pròrussa d’aquesta setmana i a fach reaparéisser lo perilh d’una guèrra a escala granda.

Merkel e Hollande denoncièron las divèrsas violacions de l’alta al fuòc —en vigor dempuèi dimenge passat—, s’engatgèron a contunhar las convèrsas amb Moscòu e amb Kyiiv per velhar sus l’eficàcia d’aqueles acòrdis, e alertèron que s’una partida los violèsse i poiriá aver mai de sancions. De tot biais, Merkel insistiguèt qu’escometián per tal de “far quicòm per la patz e l’estabilitat de la region”.

Hollande diguèt que teniá de pròvas de la supausada intrada en Ucraïna, aquestes darrièrs jorns, de tancs russes. Lo pòrtavotz de l’armada ucraïnesa, Andrei Lysenko, aviá denonciat dissabte de matin que durant las darrièras oras avián registrat l’arribada dempuèi Russia de mai d’armament.

Lo comissari europèu de la politica de vesinatge, Johannes Hahn, après aver vesitat Kyiiv, tanben insistiguèt dissabte sus la necessitat de se centrar sus lo compliment dels acòrdis de Minsk e de far pas d’especulacions amb de proposicions nòvas. D’aquela manièra, Hahn reïterava la frejor amb la quala l’UE aviá recebut la demanda de Poroshenko de dijòus de crear una mission de patz supervisada per las Nacions Unidas e formada per de policièrs comunautaris per fin que contrarotlèsson l’èst d’Ucraïna e la frontièra amb Russia, una proposicion que Moscòu l’aviá rebutada immediatament.

Subre lo terren, mentre que Kyiiv denonciava dissabte l’arribada de mai d’armament venent de Russia amb la concentracion e reorganizacion de l’enemic près de Donetzk —ciutat sota contraròtle rebèl— e de Mariupol —pòrt estrategic situat a la Mar d’Azov e contrarotlat per Kyiiv—, los secessionistas asseguravan que lo front s’èra estabilizat e que començavan de retirar d’armament, e anoncièron que se fariá dimenge l’escambi de presonièrs.
 


Natàlia Boronat




Adaptacion d’un article paregut inicialament en catalan dins Vilaweb

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma de mallorca
1.

Primier error recolzar lo cop d'estat contra lo president elegit democraticament. Segon error aceptar pas lo resultat del referendum. Tercer errer bombardejar la població civil de Donetz e sa region. Quart error ajudar a partits e grups nazis.

  • 0
  • 0

Escriu un comentari sus aqueste article