Après una accion de fòrça per d’activistas bretons, la direccion departamentala de La Poste a Kemper (Bretanha) s’es engatjada a far aqueste estiu un recensament dels emplegats que parlan breton per que los clients ajan lo drech d’èsser informats en la lor lenga.
Ièr dimècres, de membres d’Ai’ta, associacion que promòu l’oficialitat del breton, bloquèron la direccion departamentala de La Poste a Kemper, per capitar, fin finala, de s’amassar amb la direccion de l’entrepresa.
Après l’amassada, lo militant breton Dewi Siberil
n’explicava lo contengut al jornal 7Seizh, amb qui
Jornalet a un acòrdi de cooperacion.
Dins l’amassada, los representants d’Ai’ta an demandat la preséncia de la lenga a l’oral e a l’escrich e lo drech dels clients de parlar breton als emplegats de La Poste.
Lo director a argumentat que tot çò que concernís a La Poste se decidís a París, e que demandarà a la capitala francesa de que se pòt far.
Ça que la, lo director s’es engatjat a far un recensament pendent l’estiu dels emplegats que parlen breton dins los departaments de Finistèrra e Mor-Bihan, per poder balhar al public la possibilitat d’èsser informats en aquela lenga. E a promés tanben que s’informarà los clients dels portanèls on pòdon far las lors gestions en breton.
De representants d’Ai’ta e de La Poste se tornaràn amassar en setembre. Del resultat d’aquela amassada, los activistas per la lenga bretona decidiràn las accions de prene per capitar d’implantar lo breton dins l’entrepresa, fach que revendican dempuèi maitas annadas.
Un comentari
En cargar
428 lecturas
Un comentari
Mandar
