Bandièra01 1180x150: Comuna de Tolosa

Actualitats

Adieu-siatz, Sénher Spock

Malgrat sa longa carrièra, Leonard Nimoy restarà probable dins l’imaginari collectiu coma l’actor qu’encarnèt lo personatge d’Spock.

Ven de morir, lo 27 de febrièr, l’actor estatsunidenc Leonard Nimoy a Los Angeles, al centre medical de l’Universitat de Califòrnia (UCLA), ont èra anat en urgéncia per de dolors toracicas. Nascut Leonard Simon Nimoy un 26 de març a Boston, aviá pas encara 84 ans. Luchava despuèi d’annadas contra una malautiá deguda al tabatisme, una broncopneumopatia cronica obstructiva, e per aiçò recomandava regularament a sos admiradors de defugir lo consum de tabat.

Tre son enfança, voliá èsser actor e comencèt de jogar quand aviá uèch ans, al teatre. Sa carrièra, començada al cinèma en 1951, s’orientèt tre 1952 e se desvolopèt dins los ans 1960 amb lo genre de la sciéncia-ficcion. Per totòm, Leonard Nimoy s’assòcia al ròtle de l’extraterrèstre mièg uman, mièg vulcanian Spock de la primièra sèria Star Trek, de 1966 a 1969 —va faire tanben la votz del personatge de la sèria en dessenhs animats de 1973—, puèi dins de filmes fins en 2013. E mai ne realizèt e scenarizèt dos, en 1984 e 1986, e foguèt lo productor executiu del de 1991. Sos ligams amb lo personatge del mièg vulcanian foguèron tan fòrts que lo faguèron escriure doas autobiografias, I am not Spock (Soi pas Spock) en 1975, mas… I am Spock (Soi Spock), vint ans puèi!

De religion josieva ortodòxa, d’origina asquenazita ucraïnesa —parlava e legissiá correntament lo yidish—, inventèt lo famós e emblematic gèst vulcanian de saludacion amb la man segon lo de religioses quand avián de benesir.

Tanben remplacèt Martin Landau dins las sasons 4 e 5 de la sèria Mission: Impossible (1966-1973), foguèt realizaire de qualques filmes coma la comèdia Tres òmes e un nenon de 1987, apareguèt dins fòrça episòdis de sèrias televisivas, participèt a de projèctes teatrals, publiquèt de recuèlhs de poèmas e de fotografias…  Totun, nos serà impossible de separar Leonard Nimoy del personatge d’Spock que, malgrat sa freja logica vulcaniana, es en cèrca de son umanitat.

Adieu-siatz, Sénher Spock!
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Guilhèm Thomàs Tolosa
1.

Me buti lèu lèu a far una plancarta : "Soi Spock" :)

  • 5
  • 0

Escriu un comentari sus aqueste article