Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcGavaldanAubrac

An manifestat per gardar lo tren d’Aubrac

Los manifestants denóncian una politica ferroviària destructritz de l’SNCF que vòl barrar en decembre que ven la linha de tren Clarmont-Nuçargue-Besièrs

Mièg milerat de personas an manifestat aqueste dissabte a Sanch Ale d'Apchièr (Aubrac) per defendre la linha de tren Clarmont-Nuçargue-Besièrs, que los manifestants crenhon sa desaparicion a la fin de l’annada. Fa vint ans que se lucha per conservar aquela linha rurala.
 
Convoquèt la manifestacion lo Comitat Pluralista de Defensa e Promocion de la Linha Besièrs-Nuçargue-Clarmont-París, que recebèt lo sosten del partit ecologista EELV e del Partit Comunista Francés (PCF). Los manifestants denóncian una politica ferroviària destructritz de l’SNCF.
 
En contrast, l’estat francés, en la persona del primièr ministre Manuel Valls, faguèt lo viatge a Montpelhièr lo 22 de decembre de 2014 per signar lo contracte de plan. Es un document que precisa quinas seràn las participacions financièras de l’estat e de la region de Lengadòc-Rosselhon entre 2015 e 2020. Segon la volontat de l’estat, aqueste plan prevei la construccion de doas garas TGV en Lengadòc: una a Manduèlh a 10 quilomètres de Nimes e l’autra a Latas que se tròba al ras de Montpelhièr. Denonciada per EELV, la construccion d’aquestas doas estacions, del temps que desmargan d’estacions segondàrias, fa la demostracion que çò que l’estat vòl pel transpòrt ferroviari en Occitània es lo tot-TGV entre la “província” e París. Lo desvolopament de las LGV (linhas de granda velocitat) servisson pas l’interès d’Occitània mas sonque lo de França malgrat lo fach que los occitans ne pagaràn una bona partida mercés a lors impòstes.
 
Lo comportament pietadós de l’SNCF, d’RFF e de l’estat per çò que concernís las linhas segondàrias contrasta bravament amb la politica ferroviària exemplara menada per la region de Lengadòc-Rosselhon dempuèi plusors annadas. Sus qualques linhas regionalas s’èra experimentat la tarifa a 1 èuro. A partir de diluns 5 de genièr, lo prètz d’un èuro serà generalizat. Los viatjaires d’aquesta partida de Lengadòc e de Catalonha Nòrd poiràn circular a travèrs de la region per una peçòta de moneda. Son concernits los trens del malhum TÈR. Atal viatjar de Cervera de la Marenda a Sanch Ale d’Apchièr o de Castèlnòu d’Ari a Nimes costarà desenant un solet èuro. La collectivitat catalanolengadociana fa la demostracion qu’una politica publica dels transpòrts, intelligenta e sociala, es possibla e qu’es possibla sustot quand se fa en tota independéncia de l’estat.


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article