Lo vicepresident senior de Google e responsable d’Android e Chrome, Sundar Pichai, a remembrat qu’una bona partida de l’umanitat viu encara sens connexion a Internet. A donat de detalhs del projècte Loon de Google per melhorar l’accès al ret a travèrs de balons aerostatics e d’avions ultraleugièrs alimentats d’energia solara. Lo dirigent de Google a remembrat que Facebook a avançat un projècte similar a travèrs del portal Internet.org e a celebrat que divèrsas companhiás trabalhen a l’encòp per melhorar l’accès al ret de doas parts tres de la populacion mondiala qu’an pas de connexion a Internet.
 
“O devèm far melhor per aumentar la connectivitat dels ciutadans a Internet e per donar accès de mai de personas dins tot lo Mond”, çò a avalorat lo vicepresident de Google pendent son intervencion aquesta setmana passada al Congrès Mondial dels Mobils de Barcelona. Pichai a explicat que lo projècte Loom a fach d’ensages pilòt per verificar lo foncionament d’un ret basat suls balons aerostatics en Nòva Zelanda e que, puèi, prevei d’estendre aquela tecnologia a d’autras zònas del Mond. Coma exemple, a remembrat que la siá companhiá collabòra amb divèrses operators de telefonia.
 
 
Pagar amb lo telefòn mobil, ret de telefonia experimental
 
Lo vicepresident de Google tanben a avançat divèrses projèctes de la companhiá, coma l’Android Pay, destinat a facilitar los pagaments a travèrs del telefòn mobil e que se presentarà dins los meses que venon. Atanben Pichai a dich que Google trabalha per adralhar un ret de telefonia mobila de tipe experimental, mas a pas donat de detalhs del projècte.
 
Pichai a soslinhat que la tecnologia mobila fa ja partida de la vida vidanta de las personas. Coma exemple, a mostrat un vidèo ont un torista utiliza un telefòn mobil amb l’aplicacion Google Translator per comunicar amb de taxistas e de comerçants pendent un viatge a Barcelona.