An atacat lo patrimòni paleontologic de Catalonha. Dimars passat se descobriguèt d’atacs de vandals dins la zòna qu’exibissiá d’uòus de dinosaure, al sit paleontologic museïzat de Coll de Nargó, a qualques 40 quilomètres al sud d’Andòrra. An romput los uòus un per un en consciéncia e an escampilhat los tròces sul sit. Cal dire que los sits paleontologics d’uòus de dinosaures son fòrça escasses en Euròpa, e aquel èra un dels mai importants, çò rapòrta Television de Catalonha.
 
L’atac foguèt descobèrt pendent una vesita de rotina per Àngel Galobart, cap del grop de recèrca del Mesozoic del sit, qu’avisèt sul pic las autoritats catalanas. “Los uòus son estats descauçats, trencats e las rèstas apareisson dispersadas per tot lo sit”, çò diguèt Galobart als mèdias. De son costat, lo director de l’Institut Catalan de Paleontologia, Salvador Moyà, comparèt l’atemptat als atacs que los jihadistas an fach darrièrament contra los bens culturals.