Bandièra01 1180x150: Comuna de Tolosa

Actualitats

crotz-tolosaCreated with Sketch.LemosinMarchaNauta Marcha

Maijon bulla en Nauta Marcha

Qu’es la prumiera maijon bulla passiva e “autobastida”

| Habitat Bulles
Apres la maijon daus Pèiradefuòc [Flinstones], veiquí la meijon daus Barbapapà. I a cinc ans d’aquò, la familha Gribaldo comencèt de bastir ’na maijon bulla a Tercilhac (Nauta Marcha). La mairauda de Tercilhac, Colette Streicher-Trigoust, apuièt lu dorsier contra los “Bastiments de França” per balhar lu drech de construire una maijon benlèu originala mas ecologica e dins las novèlas nòrmas dins queu domeni, çò rapòrta Le Populaire.
 
Au mitan d’un prat, a l’entrada de la vila, la “bulla”, sola pèça per aura bastida, fai bargassar: “engenh non identificable”, “maijon daus Barbapapà”. Lu creator d’aquilhs personatges, l’estatsunidenc Talus Taylor, despareiguèt au mes de febrier de 2015.
 
Lu parelh Gribaldo mai los tres goiats son ’ribats dau Léger Atlantic i a cinc ans emb la volontat de trobar un terren pas char per bastir “lur projècte” e per los pitits chavaus maitot. Trobèten mai l’Internet e son aürós dau luòc: “I a aquí daus liams umans fòrts, nautres i sèm benaises”.
 
La prumiera bulla es estada ’chabada gràcias ad un chantier participatiu, menat per de las gents dau Sistèma d’Eschamge Locau (SÈL) dau departament de Cruesa, Carrousel.
 
Qu’es la prumiera maijon bulla passiva e “autobastida”. Fau saber que las maijons “bulla” coneiguèten una prumiera èrsa dins los ans 1970, mai que tot dins las regions mediterranèas.
 
Los plans son estats dessenhats per un arquitècte e mai quò siguèsse Luc Gribaldo que desvolopèt se mesme lu sistèma d’isolacion. Las fondacions per poder pausar las dietz autras bullas son realizadas, dietz bullas per las pèças de la maijon. Una vetz ’chabada, la maijon farà 160 mètres cairats. L’autoconstructor parla de las facilitats per chascun de iò poder far maitot. La maijon bulla es per principi sens teulada, bastida sus un rastèu de fèr sus lu quau es pausat una vela de betum.
 
Mas s’aquò sembla aisat a prumiera vuda, lu chantier ’vancèt gaire desempuei cinc ans, nonmàs perque Luc Gribaldo fai l’artisan plombier, quò que li daissa pauc de temps per son pròpri chantier. Lu parelh compta d’aver ’chabat un jorn, e ilhs se ratraparàn sus las economias per chaufar e se moblar, perque dins l’amainatjament d’una bulla quò se fai dès la construcion d’integrar los placards.
 
 
 
 
Joan Pèire Bertrand

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jp la rapieta
4.

#1
De segur, que la meijon daus Peirafuòc fai lebretar sus quauquas fotografias, mas sabiá pas se lu bilhet de Slate a'iá conegut 'na virada sus lu Jornalet.

#2
Fau beleu esperar que 'la siguesse 'chabada.
Mas veiquí per daus occitans vertadiers, una meijon que se reclama de « l'occitanicitat » :
http://notre-maison-coralie-et-matthieu.overblog.com/archive/2013-10/

De segur, i a tota 'na cultura aquí dedins.
Lol, dise aquò per pigolhar :-) mas sus lu fòrum Gasconha, an un tireton mai de bonas analisas sus 'queu sugier.

  • 1
  • 0
antalya apraquital
3.

#2 Coma o dises es d'un orre que se pòt pas imaginar...

M'agrada milhor la mià yorta :

https://www.yourte.com/img/eco-yourte.jpg

  • 2
  • 0
Terric Lausa Quilhan
2.

Bon Dieusses qu'es laid aquel daquòs!

  • 3
  • 1
Emmanuèl Isopet
1.

M'agrada mai l'ostal portugués (Flinstone) que non pas aquesta botiòla. Mas bon... ne cal per totes.

  • 3
  • 0

Escriu un comentari sus aqueste article