ETA mandèt ièr un comunicat ont reafirma la decision d'acabar l'activitat armada qu'anoncièt lo 20 d'octòbre d'arunan. En un comunicat enviat als jornals Gara e Naiz, l'organizacion ditz que "se fa d'esfòrces per dobrir de camins de dialòg" e critica l'accion dels govèrns espanhòl e francés, en considerant que refusan lo dialòg e que "mantenon una estrategia per arrestar e obstruir lo procès". Al delà, critica lo plan de reïnsercion de presonièrs del govèrn espanhòl perque, çò ditz, "pretend legitimar la situacion d'excepcion que patisson los presonièrs".
 
Dins lo sieu comunicat, ETA ditz que s'estrenh "las relacions amb los agents internacionals e se fa las adeqüacions intèrnas qu'exigís lo procès". Entre aquelas "adeqüacions" i a "la constitucion de la delegacion d'ETA". "Mostram lo nòstre engatjament de contunhar sus aquel camin, per portar fins a la fin l'objectiu d'arribar a la patz e a la libertat".