Lo grop dels extremistas somalians Al Shabaab an menaçat Kenya que, s’aquel estat retira pas sas tropas de Somalia, eles faràn d’autres atacs terroristas, coma lo chaple de dijòus passat, que i assassinèron 148 estudiants e professors a l’universitat de Garissa. Dins un messatge adreiçat al govèrn kenyan, los fondamentalistas soslinhan que lor demanda serà escricha amb la sang dels ciutadans d’aquel país, e los menaça que “caven lors tombas e preparen lors taüts”.
 
Es aital qu’Al Shabaab reafirma sa responsabilitat del masèl de dijòus, quand a 5h30 un grop de terroristas intrèt dins l’universitat e comencèt de fusilhar indiscriminadament, mentre que detonavan d’explosius.
 
Dins lor messatge, los d’Al Shabaab soslinhèron qu’aquel masèl solament visava las personas non musulmanas per çò que los terroristas separèron e daissèron viure los que seguisson l’islam.
 
Los extremistas acusan las tropas kenyanas que son en Somalia, dins la mission que l’ÒNU a dins aquel país, de bombardar de vilatges e de tuar de civils.
 
Dempuèi 2012, aperaquí 400 personas son estadas tuadas en Kenya per lo grop terrorista Al Shabaab.