Bandièra01 1180x150: Comuna de Tolosa

Actualitats

Lei de l’intelligéncia: l’estat francés vòl susvelhar Internet

Comença uèi lo debat d’una proposicion de lei contestada. Las societats principalas d’Internet menaçan de quitar l’estat francés

| Paterm
Comença uèi a l’Assemblada estatala francesa lo debat per una proposicion de lei fòrça polemica. Amb la tòca de combatre lo terrorisme, la dicha Lei de l’intelligéncia (Loi sur le renseignement) permetriá la susvelhança indiscriminada d’Internet, segon Libération. La proposicion a revelhat las criticas de las associacions de defensa de las libertats, de la magistratura e de las grandas societats d’Internet coma Facebook e Google, que menaçan de deslocalizar lors infrastructuras e lor personal se lo tèxt es aprovat.
 
Amnestia Internacionala e d’autras organizacions de dreches umans an denonciat una extension preocupanta de la susvelhança. “Las nòstras organizacions exprimisson lor chepic mai viu tocant aquel projècte de lei que prepausa d’installar de tecnologias de vigilància dirèctament en cò dels provesidors d’accès a Internet e dins las entrepresas de telecomunicacions per tal d’analisar totas las activitats sus Internet, gràcias a d’algorismes desvolopats pel govèrn. Las nòstras organizacions considèran que se tractariá de l’installacion de sistèmas de susvelhança de massa qu’anarián contra lo respècte de la vida privada dels internautas, e mai qu’aqueles sistèmas poirián potencialament far mal a la libertat d’expression e qu’entraïnan de grèvas derivas”.
 
Aquel chepic es seguit per la Comission Estatala de l’Informatica e de las Libertats, lo Conselh Estatal del Numeric, d’operators de telecomunicacions, de servicis d’Internet, lo Sindicat de la Magistratura, l’Òrdre dels Avocats de París e quitament per lo jutge antiterrorista Marc Trévidic e l’associacion de defensa de las libertats en linha La Quadrature du Net.
 
 
Las grandas societats d’Internet menaçan de quitar França
 
Los principals albergaires de l’estat francés an publicat una sòrta de letra dobèrta a Manuel Valls e als parlamentaris que critican tot particularament l’article que permetrà als servicis d’intelligéncia d’installar de “boitas negras” sus lors servidors, amb la tòca de localizar de comportaments suspèctes a partir d’algorismes predictius.
 
“Cal dotar França de mejans d’informacion necessaris per luchar contra lo terrorisme. I a pas cap de debat sus aquò: l’actualitat soslinha regularament l’importància de la lucha contra lo terrorisme. Ont lo projècte de lei d’intelligéncia pausa problèma, es qu’en volent èsser capable de captar en permanéncia totas las donadas personalas dels utilizaires, especialament per mejan de «boitas negras», lo projècte de lei del govèrn es pas solament liberticida, mas atanben antieconomic, e per l’essencial, ineficaç tocant son objeciu”, çò dison los albergaires, en apondent qu’aquela lei “empedirà de reüssir lo reviscòl economic del nòstre país, en destrusent un dels rars avantatges competitius màgers que possedissèm (lo suènh portat a la proteccion de las donadas personalas) e nos farà passar al costat de la valor economica dels emplecs que poiriam crear dins lo numeric”.
 
Se los albergaires quitavan l’estat francés, Occitània seriá particularament tocada e se perdriá un fum d’emplecs, sustot a Tolosa, Rodés e Fijac.

 
E poiriatz, vos, èsser espionat?
 
Libération a mes en linha una espròva per saber se, vos, poiriatz èsser victima de l’espionatge de l’estat sus Internet amb aquela nòva lei. Clicatz aicí e vesètz-ne lo resultat

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc mallorca
8.

Efectivament Guevara ja hi estam susvelhats, mas lo que volen lo faxisme d'estat es poder portar a judici a la gent, e que las escoltas serveissin d'acusacion. Una gran contradiccion car los que cometen un delicte son los estats, que es diuen democratics, qu'espien a la poblacion.

  • 0
  • 0
Pirolet
7.

#6 Léo èra de Monègue. Lo Prinçòt l'a degut escotar: es er aquò saique que Monègue es pas socialista.

  • 3
  • 0
antalya apraquital
6.

#5 Es lo cantaire niçard "Léo Ferré" qu'o disia :"Lo socialisme es l'anti cambra del fascisme".. de meditar !

  • 4
  • 3
Ernest Guevara Jr. L'Avana
5.

#2 Susvelhats, pensi qu'o sèm dempèi un brave bocin de temps. E pensi tanben que la dictatura es ja aicí, amb o sens F.N.

  • 3
  • 0
Ernest Guevara Jr. L'Avana
4.

#3 La stasi o la N.S.A. ?

  • 2
  • 0

Escriu un comentari sus aqueste article