I aviá la “Janseminada”, plaça ara a la caminada urbana bilingüa. Es un concèpte novèl que permet de partir a la descobèrta d’Agen, “Pèrla del Miègjorn”, a travèrs de sas plaças e de sas carrièras, guidats per Joan-Pèire Alari, persona ressorsa per la lenga e la cultura occitanas a la comuna d’Agen. Dins la vesprada de dimenge passat, amb un solelh luminós, 70 personas èran al rendètz-vos, Plaça Armand Falièras, per participar a aquel eveniment dins l’encastre de la 6a Quinzena Occitana. Es un percors comentat en occitan e en francés que las menèt a la Plaça de Verdun, a la Plaça dels Jacobins, al Gravèr, a l’ancian salon de cofadura de nòstre poèta Jansemin ont se trucan lo sègle XIX e lo sègle XXI, a la Plaça Jansemin e subretot al 16 de la Carrièra dels Carretièrs que sos estajants nos dobrigèron aimablament la pòrta e nos permèteron d’anar veire al fons de la cort lo vertadièr ostal natal de Jansemin, lo qu’òm vei pas jamai. Foguèt un moment d’una emocion intensa per totes. Vegèrem puèi las roïnas de la Glèisa Sant Alari d’origina ont Jansemin se maridèt, la Carrièra Potz del Saumont e l’enigmatic Ostal del Senescal, la Plaça de la Catedrala, las cornièras, la Plaça dels Lachièrs e atraversèrem çò que foguèron probable de “jusaigas” e per acabar la plaça de la comuna, tan cargada d’istòria.
 
Nos esperava a la sala dels illustres Joan-Max Llorca que representava lo conse d’Agen. Aprèp las dichas costumièras mas pasmens calorosas en francés e en occitan, un vibrant “Se canta” restontiguèt jos l’agach aprovaire d’un dels illustres que son retrach òrna la sala: Jacme Boèr dich Jansemin. E aprèp, los caminaires assedats se poguèron refrescar amb de fruchadas d’Òut e Garona. Totas las caras resplendissián de bonaür d’aquela vesprada passada amassa a la descobèrta de nòstra vila dins nòstra tan bèla lenga occitana.
 
 
 

Joan-Pèire Alari