Aqueste còp i sèm: la finala del campionat d’Elèit se debanarà aqueste dissabte 9 de mai a 3 oras del vèspre a Colomièrs. Fàcia a fàcia, los detentors del trofèu, lo Tolosa Olimpic, e l’AE Carcassona. Es de mal dire quala de las doas esquipas soslevarà lo bloquièr Max-Rousié. Se los Canaris renovèlan lor partida de la mièja finala contra los Dragonets, es segur que poiràn faire fèsta dissabte de ser sus la Plaça de las Èrbas. Mas Tolosa comptarà un còp de mai amb sas individualitats (Ford, Keirallah, Hulme...) per faire la diferéncia.
 
En dobertura, los juniors de Limós e d’Avinhon se disputaràn lo trofèu de la categoria.
 
Se podètz pas anar a Colomièrs (mas seriá plan pecat), vos rapelam que France 3 Sud retransmetrà en dirècte la partida. Tanben podètz gaitar los imatges a la television e escotar la retransmission de la partida en occitan sus Ràdio Lenga d’Òc Narbona.
 
 
Los Tigres-Moissals fissan los Dracs
 
La jornada de Superliga comencèt dijòus de ser per una egalitat entre Huddersfield e Leeds 24-24. Divendres, Hull FC batiá Salford 24-20 mentre que St. Helens dominava aisidament Wakefield 44-4 e que Wigan èra sens pietat per Hull KR: 60-0.
 
Dimenge, vèrs la fin, Warrington ganhèt contra Widnes, 22-20, mercé un ensag de l’alièr Monaghan sus la còrna.
 
A Castleford, los Dracs, sens Carney encara nafrat, trapèron pas lo biais de lutar contra los Tigres-Moissals. Se daissèron despassar dins lo primièr temps pels contras assassins dels locals. Foguèron menats 20-0 abans de marcar just abans la pausa: lo primièr ensag en Superliga per Foad Yahà. Dins lo segond temps, Garcia marquèt dos còps: 20-18 pels Tigres que tornèron marcar. Los Dracs repliquèron. Los Sang e Aur vendemièron un dos contra un e concediguèron dos novèls ensages: 36-24. L’ensag sus la còrna, lo tresen de la vesprada, per Benjamin Garcia cambiava res a l’afar: 36-28.
 
Dissabte, a 6 oras del vèspre, los Dracs recebràn a Brutus los campions St.Helens. Se pòt regretar (mas atal va tròp sovent lo mond tretzista!) la concurréncia amb la finala del campionat! D’aitant mai que los Dracs auràn besonh d’un sosten bèl del pòble tretzista occitan e catalan.
 
 
Los Kiwis, numèro 1 de la planeta
 
A Brisbanw, l’ANZAC Test entre Cangorós e Kiwis se joguèt pas divendres coma previst: la pluèja aviá interdita la circulacion sus las autoestradas! Calguèt esperar dimenge per veire Shaun Johnson faire de misèrias als Verds e Jaunes. Los neozelandeses menèron 26-6 a la pausa e resistiguèron dins lo segond temps per ganhar: 26-12. Una victòria que lor i permet de prene, pel primièr còp, lo cap de fila del classament de la Federacion Internacionala!
 
Dins los autres rescontres internacionals: victòria de Fiji —amb Millard, èx-Drac; Vunakece, ex-TO; Sadrau, ex-ASC— contra Papoasia, 22-10; victòria de Samoa contra Tònga, 18-16; l’Africa del Sud pòt res contra l’illa de Niue: 48-4. A la diferéncia dels ainats, los juniors australians baton los joves neozelandeses: 22-20.
 
 
En Elèit 2, finala entre vesins
 
Aprèp las mièjas finalas d’aqueste dimenge a Sant Gaudenç, la finala d’Elèit 2, que se jogarà lo 17 de mai a Montpelhièr, serà una oposicion tarnesa entre Albi (venceire de Vilafranca 51-14) e l’Escura (qu’a ganhat contra Baó 38-20).




Alan Roch