Bandièra01 1180x150: Comuna de Tolosa

Actualitats

Mariano Rajoy qu’aumente er IVA (TVA) e que gèle es salaris des foncionaris

Qu’a arreconeishut qu’amie a tèrme ua politica totafèt opausada a çò que prepausèc en sòn programa electorau



Eth president deth govèrn espanhòu, Mariano Rajoy, qu’anoncièc ager qu’era Union Europèa l’obligue a aumentar er IVA generau de 18% a 21%, e er IVA redusit, de 8% a 10%. Se mantierà er IVA fòrça redusit de 4%, entà productes de prumèra necessitat.

Que notifiquèc tanben ua reduccion deth salari des foncionaris des administracions der estat, des comunitats autonòmes e des entitats locaus. Segontes Rajoy “non son cap ues mesures agradiues mès que son imprescindibles”.

Ath delà, i aurà reduccions pressupostàries enes ajudes as persones damb dependéncia, enes prestacions ath caumatge e ua liberalizacion, o privatizacion, des camins de hèr e des aeropòrts.
 
Rajoy que justifique totes aguestes mesures impopulares en tot díder que “non podem causir, non auem cap aguesta libertat”. Eth president espanhòu ahigie que “hè dòu, mès qu’ac cau hèr pr’amor que mercés ad aguesti sacrificis individuaus poderam conservar tot aquerò que compartim”.

Qu’a arreconeishut qu’amie a tèrme ua politica totafèt opausada a çò que prepausèc en sòn programa electorau. Be prometèc que non aumentarie cap es impòsti e be hec ua campanha plan energica de protèsta contra era pujada der IVA quan ac volie amiar a tèrme eth govèrn precedent.
 
Es reaccions son estades nombroses, mès que cau soslinhar es protèstes des municipalitats, qu’incrementaràn era sua despensa e que veiràn ua pèrta de còssos (conselhèrs municipaus) que pòt supausar era pèrta dera representacion de fòrça partits elegidi democraticaments.

Es principaus sindicats der estat qu'an anonciat mobilizacions.




Ferriòl Macip

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ferriòl Macip
2.

#1 Çò qu'entà tu ei eth "còsso", en Aran qu'ei eth "baile". E çò qu'en Aran ei eth "còsso", en estat francés qu'ei eth "conselhèr municipau". Mercés peth tòn comentari, qu'ajusti en tèxte ua aclaracion.

  • 2
  • 0
BOURDON Auloron
1.

N'èi pas comprés: "ua pèrta de còssos", e vòu díser que hèra de maires e van demissionar ? "Còsso", e vòu díser "elejut municipau" com en gascon d'ací ?

Audement, er'Espanha que sembla de gahar eth camin dera Grècia. Qu'ei dramatic. Dinc on e caleré anar, dinc a quin hons e calerà baishar entà que la Merkelassa e comprenga que cau cambiar de camin i mutualizar eth deute en creant "eurobonds" ? Ac comprenerà abans qu'era zòna èuro esclate - o qu'eths pòbles e's revòlten ?

  • 0
  • 0

Escriu un comentari sus aqueste article