Bandièra01 1180x150: Comuna de Tolosa

Actualitats

Rugbi XIII: e lo pè de Lucàs Albèrt non tremolèt...

Abans de parlar de las partidas, tornarem sus dos eveniments bèls.
 
Primièr: lo jorn de la finala del campionat se presentèt lo numèro 1 d’una novèla tièra de XIII Magazine, un mesadièr amb abonament que sortirà 10 còps l’an a comptar de setembre e que repren lo títol de la revista arrestada fa mai de dètz ans per rendre compte de l’actualitat e de l’istòria de nòstre espòrt. Una polida maqueta, de fotografias supèrbas, d’articles bèls e una croniqueta occitana: longa vida al novèl XIII Magazine (distribuit solament per correspondéncia, bulletin a telecargar, abonament de 38 èuros, chèc a l’òrdre de Treize Rugby Events, de mandar a: Axe Sud, 48 Grand Carrièra Sant Miquèl, 31400 Tolosa)
 
Dimècres passat, sus la Plaça de las Èrbas a Carcassona, se festegèron los 70 ans del cafè Chez Félix. De segur, lo grand jogaire, grand entraïnaire e grand cafetièr, Fèlix Bergèze, jòga ara sus la pelena etèrna, coma sa femna Danisa, mas lo cafè contunha de téner son ròtle bèl de luòc de convivialitat, de rescontre per totes e tanben una referéncia d’istòria e del present del XIII.
 
Mas vejam ara l’eveniment bèl de la dimenjada.
 
 
U18: los Blaus arrancan la victòria
 
Dissabte de vèspre, a l’estadi Domèc (Carcassona), los U18 Blaus recebián los angleses. Los vesitaires marquèron dos còps d’entrada, mas a fòrça de coratge, los Poletons passèron tres còps la rega anglesa per èsser menats pas que 22-18 a la pausa. Lo segond temps, los Blaus beneficiavan del vent. Lo metèron a profièit per remandar los Roges dins lor camp e per prene los punts al pè (penalitats e tombat). Tant es qu’a 3 minutas de la fin, menavan 33-28. Sul remandadís, los angleses recuperavan la palma e lo segonda linha s’espatarrava al pè dels pals: amb la transformacion, 34-33! L’an passat, ja, los Blaus s’èran fait doblar sul fil. Mas, sus la darrièra cadena de tenguts, los angleses montavan tròp lèu. Penalitat, dels 40 mètres a esquèrra, lo pè del dobertura Lucàs Albèrt tremolèt pas e la palma passèt entre los pals. Victòria dels Blaus: 35-34 e òsca per l’esquipa, sa valentesa, sa solidaritat e son esperit d’iniciativa.
 
 
Cup: qualificacion complicada pels Dracs
 
Los oitens de la Cup comencèron per un pet de tròn: Wigan eliminat sus sa pelena per Hull KR: 16-12. Dissabte, Hull FC eliminèt Castleford 40-14 e los Gigants d’Huddersfield virèron nanets contra Leeds: 16-48. Dins las oposicions Superliga-Championship, Wakefield menèt 24-6 a la pausa mas perdèt 36-30 fàcia als Centurions de Leigh; qualificacion aisida per St. Helens (46-6 contra York) e per Warrington (52-10 a Dewsbury). Foguèt mai complicat per Widnes (26-22 contra Batley) e pels Dracs qu’afrontavan Featherstone, menat pel catalan-mièg de mesclanha Remi Marginet.
 
L’entraïnaire Fraissinós aviá causit de faire virar l’efectiu. La defensa se mostrèt elastica e sovent presa a defaut al ras del tengut, mas los Dracs capitèron a virar a 18-12 a la pausa. A la represa, lo pilar Limà cargava Marginet a retardament, espatla enabans: carton roge. Los Dracs passèron la darrièra mièja ora a 12. Se faguèron doblar 30-24 pels angleses abans de trapar, dins las darrièras minutas, las ressorsas per se qualificar: 37-34.
 
La darrièra dimenjada de junh, los quarts de Cup se presentaràn atal: Hull KR recebrà los catalans, Warrington Wolves jogarà contra la darrièr representant del Championship Leigh Centurions http://www.leighcenturions.com, Hull FC recebrà Leeds Rhinos e St. Helens los Vikings de Widnes.
 
 
En esperant lo primièr Estats d’Origina
 
En NRL, la pression monta: lo dimècres 27 de mai, se jogarà lo primièr Estats d’Origina de la sason. Los Broncos de Brisbane, batuts pels Vaquièrs 31-20, daissan la primièra plaça a la Tempèsta de Melbourne que baton los campions Lapinons 16-12. Doas partidas van al punt d’aur: amb un tombat, las Làmias baton los Titans 23-22 e cal un ensag als Combatents neozelandeses per ganhar cò de las Anguilas de Paramatta: 17-13.
 
 
Albi, campion cap a l’Elèit 1
 
A Montpelhièr, dimenge de vèspre, Albi ganha la batèsta fratricida contra l’Escura 21-14 en finala d’Elèit 2 e va preparar al melhor la montada en Elèit 1 per la represa de setembre.
 
A Tonens, dins la finala de la Copa Déjean de las esquipas de Federala, calguèt tanben anar al punt d’aur e a un tombat a la 100a minuta de jòc per que Ferrals de las Corbièras batèsse Preissan-lo Lauquet: 27-26.
 
 
De Sant Estève a Ramonvila
 
Aqueste divendres 22, a 7 oras del vèspre, sus l’estadi municipal de Sant Estève, se debanarà un rescontre internacional que serà una primièra: l’esquipa de França, compausada sonque de jogaires d’Elèit, jogarà contra Serbia, que ven de batre Russia: 20-15. Un signe de l’espandiment del XIII en Euròpa amb l’arribada de nacions novèlas.
 
Dissabte, a Brutus (18h), aprèp una partida de dobertura entre las formacions U19, partida bèla entre los Dracs e Wigan. Las doas formacions recercaràn la victòria: Wigan per se remetre de l’eliminacion en Cup e los Dracs per contunhar de montar al classament.
 
Dimenge, a Ramonvila, se debanaràn doas finalas de Nacionala 1. Pel grop B, lo club local afrontarà la resèrva de Limós XIII: Preissan-lo Lauquet. En Grop A, lo bloquièr se jogarà entre las Corbièras, representadas per Ferrals, e Cabardés, representat per Vilagalhenc-Argon. La flaira incomparabla del rugbi de vilatge...
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Dins lo N° 1 de XIII-Magazine
En tretze mots… : BLOQUIÈR O COPA ?
La prima es lo temps de las finalas : aquí, cal ganhar e punt ! Se sètz campions (de França, de la Liga, del Comitat, en minimes, cadets, juniòrs, federala, femininas, Elèit... : qu'impòrte !), lo bloquièr de joslevar, una fotografia polida e una data-sovenir per tota la vida (la seuna e l'istòria de l'equipa).
Mas val mai benlèu se ganhar la Copa qu'i pòdes beure dedins en fraternitat chuc de frucha, vin (e n'i a de plan bons en tèrras tretzistas) o blanqueta !

  • 3
  • 0

Escriu un comentari sus aqueste article