Bandièra01 1180x150: Comuna de Tolosa

Actualitats

crotz-tolosaCreated with Sketch.GuianaCarcinLimarga e Segalar Carcinòl

De Rencontres d’Òc reüssits al collègi de la Capèla de Marival

Se debanan dempuèi tres ans a l’iniciativa del professor d’occitan e amb lo sosten del principal

A la cantina
A la cantina
Dempuèi tres ans, a l’iniciativa del professor d’occitan e amb lo sosten del principal, de Rencontres d’Òc se debanan al collègi Jean Monnet de la Capèla de Marival (Limarga).
 
Ongan, se debanèron lo divendres 12 junh tota la jornada e foguèron orquestrats pels escolans d’occitan. De matin, aquestes prepausèron d’activitats per totes los escolans de seisena: mots mesclats, questions per s’amusar, jòc de memòria al dòjo e frasas de retrobar a partir d’indicis, jòc del dessenh dins la cort del collègi. Dins l’encastre dels Rencontres d’Òc, un repais occitan foguèt servit a la cantina amb al menut d’ensalada carcinòla, de trufada e de cambajon de país, de cantal o de ròcafòrt e de tarta de noses. Aquel repais foguèt acompanhat d’una animacion musicala assegurada pel jove Guilhèm Boucher e son violon.
 
D’aprèsmiègjorn, los escolans d’occitan foguèron aculhits a l’ostal de retirada la Misericòrdia (la Miséricorde) ont presentèron als residents una adaptacion de la pèça de teatre bilingüa Plegasardas al permés de menar e de cants occitans trabalhats pendent l’annada escolara. Un vespralh venguèt acabar aqueles moments d’escambis plan convivials.
 
Aqueles Rencontres d’Òc s’esperlonguèron en serada a la sala de las fèstas de Ruèiras (pròche la Capèla de Marival) davant un seissantenat de personas amb en primièra partida la pèça de teatre bilingüa e los cants pels escolans d’occitan e en segonda partida la darrièra pèça de l’Illustre Teatre d’Anglars, Lo Miracle de Sant Emilion. Foguèt una serada organizada per l’associacion de parents d’escolans del collègi.
 
Òsca a totes los collegians d’occitan e a l’annada que ven!
 
 
 
 
Estève Clerc

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Aquò bolega de pertot e s'aviam pas la premsa en occitan o saupriam pas!

  • 9
  • 0

Escriu un comentari sus aqueste article