Bandièra01 1180x150: Comuna de Tolosa

Actualitats

Se constituís en Peiregòrd lo Collectiu dels Mespresats

Diluns depausarà una requèsta en anullacion de la reforma del collègi

| Marciau Peyrouny
Se constituís en Peiregòrd lo Collectiu dels Mespresats, amb la tòca d’exigir al Conselh d’Estat l’anullacion de la reforma del collègi dins l’estat francés. Una reforma, prevista per la rintrada de 2016, prevei de marginalizar mai encara l’ensenhament de l’occitan, mas contraven a una sèria de convencions e es aquò que lo Collectiu dels Mespresats cèrca de denonciar.
 
“Aquela reforma, d’efièch, representa de la part de l’estat central un abús de poder que va contra las convencions signadas amb los rectorats per la region de Miègjorn-Pirenèus, los departaments de Tarn, Tarn e Garona, los Nauts Pirenèus, Gers, Avairon, la region d’Aquitània e los departaments dels Pirenèus Atlantics, Gironda, Dordonha e Òlt e Garona, dins lo quadre de l’article L.312-10 del Còde de l’educacion”, çò nuança lo collectiu.
 
 
Una requèsta en anullacion de la reforma del collègi
 
La primièra accion serà de depausar formalamant una requèsta en anullacion de la reforma del collègi. Segon un comunicat de premsa, se demanda a totes que manden un mandat, segon lo modèl en pèça joncha, a Marçau Peyrouny, professor fòra classa certificat d’occitan e de letras modèrnas, cavalièr de las palmas academicas, “per vos representar dins aquela cambada cap al Conselh d’Estat. Lo mandat deu absoludament èstre signat de la vòstra man per èsser valable”.
 
La requèsta se depausarà diluns que ven a 11h en preséncia de la premsa e dels “mespresats” al numèro 1 de la Carrièra del 4 de Setembre de Peireguers.
 
 
Un movement social occitan
 
Aquela accion ven en seguida de la manifestacion reüssida per l’occitan a l’escòla, al collègi e al licèu que se debanèt a Peireguers lo 6 de junh passat, e qu’amassèt aperaquí 300 personas per carrièras.
 
Lo Collectiu dels Mespresats pren lo nom del movement eissit en seguida de la cauma de la fam que faguèt Dàvid Grosclaude per exigir que l’estat desbloquèsse la creacion de l’Ofici Public de la Lenga Occitana (ÒPLO).
 
 
La reforma francesa dels collègis
 
La reforma francesa dels collègis es un pas enrèire quitament per rapòrt a la lei francesa de l’educacion de 2013 e, un còp de mai, contra la lenga occitana. Gaireben totas las associacions restacadas a l’ensenhament de las lengas mal nomenadas regionalas se son mobilizadas contra la reforma, tant la FÈLCO d’Occitània coma Ikas-Bi del Bascoat, e parièr per totas las autras lengas. E mai, lo collectiu dels ensenhaires en general es majoritàriament contra aquela reforma, per d’autras rasons.
 
Lo 19 de mai passat i aguèt una jornada de protèsta contra aquela reforma al nivèl nacional e quitament al nivèl estatal. En Occitània, aquel jorn, se manifestèt a Bordèu, Carcassona, Clarmont-Ferrand, Lemòtges, Marselha, Montpelhièr, Mende, Narbona, Nimes, Niça, Tolon e Tolosa. Los ensenhaires d’occitan foguèron plan presents dins aquelas manifestacions, mas aquela de Peireguers èra la primièra manifestacion especificament per l’occitan a l’escòla.
 
 
Una peticion de mai de 5900 signaturas
 
Per mostrar lor desacòrdi, e per demandar que l’ensenhament de las nòstras lengas se mantenga, per que se melhore la precària situacion actuala, s’es lançada una peticion publica devèrs lo Ministèri francés de l’Educacion Estatala, qu’a ja atench mai de 5900 signaturas.
 
La Federacion dels Ensenhaires de Lenga e Cultura d’Òc (FÈLCO) es a l’origina d’aquela peticion que sos primièrs signataris son las associacions d’ensenhaires de las lengas minorizadas de l’estat francés.
 
 
 

Per mai d’informacions sul Collectiu dels Mespresats podètz contactar l’e-mail seguent: mespresats.collegi(a)gmail.com.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Peter Nollet Brussèlas
2.

Una beluga peirigòrda d'esper per la lenga ? Esperem-zo.

  • 1
  • 0
Pirolet
1.

Aquò's un primièr pas. Tornar en arrièr completament, sembla pro dificil, mas demòra la possibilitat d'emendar aquesta refòrma. Ara, lo movement dels Mespresats o cal espandir a Occitània tota. Emai, un còp capitada la tòca de uèi, anar vers d'autras. Pensi qu'amb aqueste collectiu podèm anar cap a nòstre movement dels indignats. Qual se bota a ne redigir lo libròt que, dins aqueste cas, cal que sia' bilingue?

  • 9
  • 0

Escriu un comentari sus aqueste article