Bandièra01 1180x150: Comuna de Tolosa

Actualitats

Atemptat dins una usina de gas en Arpitània

Una persona mòrta e divèrses ferits dins l’atac en una usina de gas industrial près de Lion

Un atemptat s’es comés aqueste matin dins una usina de gas industrial a Saint-Quentin-Fallavier (Arpitània) a aperaquí 30 quilomètres al sud-èst de Lion, qu’a fach un mòrt e qualques ferits. Segon lo Dauphiné Libéré, s’agiriá d’un atemptat de l’Estat Islamic. Dos òmes serián intrats dins una veitura, aurián trencat la barrièra de seguretat e aurián fach percutir l’automobila contra de bombonas de gas.


Un mòrt decapitat, assassinat per son emplegat

Près de l’usina an trobat un còrs decapitat amb de bandièras islamistas al costat. La victima seriá lo cap d'una entrepresa de transpòrt de Chassieu, una vila de la metropòli lionesa, èra lo cap del primièr suspècte detengut, segon Libération,
 
Segon Libération, que cita de fonts del ministèri de l’Interior, i a pas d’elements que permetan de conclure que l’atemptat es òbra de l’Estat Islamic.

La gendarmariá privilègia totjorn la pista terrorista.


Hollande: "l'atac es de natura terrorista"

Lo president francés, François Hollande, a confirmat que i a agut un mòrt decapitat e dos obrièrs de l’usina ferits. “L’atemptat s’es fach amb una veitura menada per un individu. L’atac es de natura terrorista. E i a pas cap de dobte de l’intencion qu’avián: volián cometre una explosion”, çò a dich lo president francés que se trobava a Brussèlas dins una reünion de caps d’estat e de govèrn.
 
Lo primièr ministre francés, Manuel Valls, a reforçat la seguretat e la vigilància dins totas las zònas especialas, mai que mai en Arpitània e Auvèrnhe.


Dos detenguts, ont un èra ja objècte d'una ficha "S"

Segon las darrièras informacions, dos òmes son estats arrestats, dont lo primièr, Yassin Salhi, l’interpellèt un pompièr. Salhi èra ja objècte d’una ficha “S” en 2006 per èsser “en ligam amb lo movement salafista”, segon çò qu’a indicat lo ministre de l’interior, Bernard Cazeneuve.
 
Lo parquet antiterrosita de París a obert una enquèsta, per “assassinat e temptativas d’assassinats en banda organizada e en relacion amb una entrepresa terrorista”. Un conselh de defensa s’es amassat a 15h30 a l’Elisi. Lo primièr ministre Manuel Valls, a escorçat son viatge en America del Sud.
 

Atemptat a Tunisia amb un trentenat de mòrts e masèl dins una mosqueta de Kowait
 
Un òme a fusilhat un trentenat de personas dins un complèx toristic de Tunisia, e l’Estat Islamic a atacat una mosqueta a Kowait, que Jornalet raportarà dins son edicion de deman.








Seguissètz las informacions en dirècte sus Twitter

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Felip Martèl Montpelhier
11.

Aqui chau far mèfi : l'adesion au salafisme, deriva dau petro-wahhabisme portat per los paises dau Gof a pas ren a veire amb la question de l'imigracion, senon chal explicar coma vai que tantos salafistas son en fach de franceses d'origin, de Kevins e de Jean-luc ordinaris, coma lo "grand Ali" qu'es estat l'iniciator dau tipe de St Quentin. E tantos autres n'i a. Co qu'es en juec aqui, es la seduccion sus d'esperits febles de quauque ren qu'es ren aure que lo misticisme dels nècis, sens raport amb quenta religion que sieie. Me sembla que los arguments de maime son de bon sens. Assajar d'analisar tranquilament ço que se passa es pas s'avuglar o far dins lo politicament correcte"

  • 1
  • 0
Peter Nollet Brussèlas
10.

#9 Malonèste e perniciós ? De tot biais pas avugle. Merah, Nemmouche, Kouachi, Coulibaly... res a veire amb l'immigracion me disètz ? Segur ? N'i a que se vòlon talament politicament corrèctes que veson pas lo dangièr de los fanatics de la religion dicha de la patz e qu'aiman pas que los autres ne parlen !

  • 5
  • 1
Matiàs Carcà
9.

#8 Mesclar immigracion e terrorisme, es pel mens, fòrça malonèste e perniciós!

  • 6
  • 3
Peter Nollet Brussèlas
8.

Ont son los responsables de l'immigracion massissa ? S'escondon per que sabon qu'es tròp tard. Pas solament "Hannibal ad portas" mas tanben "Hannibal intra muros"...

  • 3
  • 4
Pirolet
7.

Sembla que lo cadavre sens testa es lo del patron del tipe de la forgoneta. Qual es lo patron ara que serà pro suicidari per emplegar un gus, un "mosqueatòri", que lo pòt escotelar? E apuèi parlarem de discriminacion a l'emplèc.

  • 1
  • 1

Escriu un comentari sus aqueste article