Bandièra01 1180x150: Comuna de Tolosa

Actualitats

Lo Torn de França es partit d’Utrecht amb la primièra esquipa africana participanta

Serà en Occitània del 13 al 25 de julhet en començant per Bearn e en finissent per Oesen

Lo Torn de França, la granda espròva del ciclisme internacional que cada an travèrsa Occitània, comencèt dissabte passat a la vila neerlandesa d’Utrecht. I aguèt dos cents esportius de tot lo Mond, inscriches dins un vintenat d’esquipas. Demièg aquelas esquipas, per lo primièr còp, n’i a una del continent african: a nom MTN-Qhubeka e es de Sud-Africa.
 
Fins al 26 de julhet los participants percorreràn 3 360 quilomètres en vint e una estapas (vidèo), dont cal soslinhar las classicas de montanha que se debanan en Occitània, dins los Pirenèus e los Alps.
 
Lo Torn intrarà en Occitània lo 13 de julhet en Bearn. Passarà per Tarba, Cauterés, lo País Tòi e lo mitic Còl de Tormalet. Lo 16  de julhet anarà de Lanamesa fins al Plan de Belha en Savartés. Lo 17 partirà de Murèth. Tanben passarà per Rodés e Mende fins a arribar a Valença lo 19 de julhet. Lo 20 serà partit d’Arpitània per tornar en Occitània a Gap, ont los esportius se pausaràn una jornada. Lo 22 partiràn de Dinha fins a Pratlop, en Ubaia. D’ailà tornaràn a Gap per percórrer los Alps occitans e arpitans en finissent al mitic Alp d’Ueis (Oesen). Precisament sus aquela estapa  a l’Alp d’Ueis, France Bleu n’a preparat un espectaclós visual interactiu que permet de pojar l’estrada del còl e sos 21 contorns amb l’ordenador. Lo 26 de julhet l’espròva esportiva aurà quitat lo país per s’acabar a París.
 
Amb la tòca de far las retransmissions del Torn de mai en mai espectaclosas e immersivas, ongan l’organizacion e la societat Go Pro an signat un acòrdi per inserir cada jorn almens uèch camèras  sus de bicicletas d’esportius. Los imatges obtenguts se montaràn a la fin de la jornada.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Mallorca
1.

Vegí enguan lo Giro d'Itàlia e és una porqueria comparat amb lo Tor de França, surt pas cap ciutat polida importanta e solament passa per carreteras secondarias, vaja merda! Per contra lo Tor és una passada,un gran espectacle mundial. Lo que plus me plats és quan va per Occitània, quin paradís, de belhesa frondosa e exuberant. L'Ai vist passas per Marselha, Provença, lo lengadoc, Montpelhier, Pau, Bordeu e tamben Vielha. Un gran espectacle. Esperi veire drapels occitans com l'an passat.

  • 1
  • 0

Escriu un comentari sus aqueste article