Bandièra01 1180x150: Comuna de Tolosa

Actualitats

Grècia a demandat formalament a l’Union Europèa lo tresen salvament

Tsipras a demandat al Parlament Europèu un acòrdi “qu’evite un trencament istoric”

| Laura Pous (ACN)
Lo govèrn grèc a ja sollicitat formalament lo tresen salvament. Lo mecanisme europèu d’estabilitat ne recebèt ièr la demanda. Los ministres de las finanças de l’Eurozòna s’amassèron arser en teleconferéncia per discutir d’aquela demanda del govèrn grèc. Lo primièr ministre grèc, Alexis Tsipras, defendèt al Parlament Europèu que vòl un “acòrdi equilibrat” amb las institucions per evitar “un trencament istoric” d’Euròpa. Dins son sojorn a Estrasborg, Tsipras diguèt que prepausa “de reformas de vertat” e qu’a un “mandat clar e categoric del pòble grèc” per acceptar pas las recèptas de l’austeritat.
 
“Mon país foguèt utilizat per experimentar l’austeritat, e l’experiéncia a mal capitat”, çò diguèt Tsipras. Segon el, los grècs vòlon pas èsser “una carga addicionala pel contribuent europèu” mas, çò apondèt, l’argent del salvament serviguèt “per salvar las bancas grègas e europèas, l’argent arribèt pas jamai als ciutadans”.
 
“Assumissi tota la responsabilitat de çò que s’es passat dins los darrièrs cinc meses e mièg”, çò diguèt Tsipras als eurodeputats, en avertissent, totun, que cal “reconéisser que la responsabilitat iniciala per la situacion de l’economia grèga es pas causada pels darrièrs cinc meses e mièg, mas pels darrièrs cinc ans e mièg”.
 
Segon Tsipras, lo sieu govèrn vòl “de reformas de vertat” que càmbien “lo foncionament del país, que trenquen amb l’ancian sistèma politic”. “Nos cal afrontar de manièra eficaça las estructuras d’oligopòli dels cartèls de l’economia grèga”, çò diguèt Tsipras, en prepausant tanben una fòrta lucha contra “l’evasion fiscala”. Lo primièr ministre grèc assegurèt que los govèrns grècs precedents creèron un “estat clientelista, fomentèron la corrupcion e refortiguèron los ligams amb los elèits economics”.
 
Lo primièr ministre grèc soslinhèt que lo mandat “clar e categoric” que li donèt lo pòble grèc al referendum foguèt per “cambiar las mentalitats e las proposicions qu’an menat lo país a la quincanèla” e non pas per “intrar en collision amb Euròpa”. “Sèm dins un moment crucial, e la crisi grèga al fons representa l’impoténcia collectiva d’Euròpa per trobar una solucion a la crisi del deute, que se retroalimenta”, çò avertiguèt Tsipras.
 
Segon lo primièr ministre grèc, l’istòria europèa a “de conflictes, mas a la fin totjorn capita ben a arribar sus los terrens de la compreneson”. “Demandam un acòrdi equilibrat per evitar un moment de trencament istoric”, çò diguèt Tsipras, en tot demandar als sieus collègas europèus que s’avisèsson “del moment critic” actual e que respondèsson, coma el a dich que fariá, “en assumissent la responsabilitat istorica” qu’an.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernèst Guevara Jr. L'Avana
1.

La compreneson a l'europèa, aquó's "Liberal, sempre mai liberal, res mai que liberal". La borgesiá pòt roncar plan tranquilla, sul sieu lièit de misèria, los paurasses an pas degun mai cap a qual se virar electoralament. E quora votar non basta mai per melhorar las causas, sabètz çò que demòra…

  • 0
  • 0

Escriu un comentari sus aqueste article