Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaComengeCoserans

Occitans e catalans se rescontraràn un còp de mai a Salau dimenge que ven

Dins aqueste 28n rescontre, se revendicarà un còp de mai la cultura comuna occitanocatalana e las relacions transfrontalièras que deurián ligar los païses de Palhars e Coseran e mai las nacions occitana e catalana

| Caoc Cat
Coma cada an dempuèi vint e uèch ans, de centenats d’occitans e catalans s’amassaràn dimenge que ven, 2 d’agost, al Pòrt de Salau, al limit occitanocatalan, en Coseran, a 2100 mètres d’altitud. Los participants pojaràn del costat occitan dempuèi Salau (Coseran), en tot marchar doas oras e mièja, e del costat catalan dempuèi Esterri d’Àneu (Palhars Sobeiran) en tot caminar qualques 45 minutas. L’amassada es organizada pel CAÒC e per l’ASPIC, coma una escorreguda d’amistat e de revendicacion nacionala dels dos pòbles vesins. Ongan la jornada compta amb lo sosten de l’Assemblada Nacionala Catalana (ANC), Òmnium Cultural e qualques elegits catalans.
 
Un còp sul pòrt, i faràn d’actes d’afrairament amb un escambi de produches dels dos costats: de formatge, de vin, de liquors amb de ratafià, de galetas, de chocolat, de carnsalada, etcetèra. Tanben i dançaràn de danças tradicionalas al son dels musicians pirenencs, occitans e catalans. Al delà, se debanaràn, coma d’abitud, los discorses de benvenguda, las cançons e los imnes en issant las doas bandièras.
 
L’emplaçament d’aquel pòrt es simbolic: es un camin natural entre Occitània e Catalonha qu’a servit istoricament per far de comèrci e per connectar los dos pòbles. Pendent la Guèrra d’Espanha de milièrs de republicans i passèron en essent sus lo camin de l’exili. Normalament los occitans i menan lo formatge del temps que los catalans menan lo vin.
 
Normalament tanben participan de musicians e d’elegits dels dos costats del “calhau” e se revendica la cultura comuna occitanocatalana e las relacions transfrontalièras que deurián ligar los païses de Palhars e Coseran.
 
 
Dissabte, un jorn abans la pojada a Salau, se debanaràn divèrses actes culturals del costat catalan, mas restacats amb la cultura occitana. A Estèrri d’Àneu, dins l’Ecomusèu de las Vals d’Àneu, se projectarà dos documentaris etnografics en lenga occitana. De ser i aurà un concèrt del grop occitan Bolhida de Sons e d’acordeonistas del país. En seguida se debanarà un balèti.
 
Ongan podètz descargar d’Internet qualques informacions utilas d’aquela amassada occitanocatalana de referéncia:
 
Lo programa segon lo CAÒC
Lo programa segon l’ASPIC.
L’aficha de l’eveniment
L’itinerari per montar d’a pè del costat catalan.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
1.

Som pobles germans, tenim històries comunes.
Macià a principes del selge XX, parlava de la conferderació entre Catalunya i Occitània, Pere I, i Ramon de Tolosa, també.
Possem-s'hi!
"El Tàrrega"

  • 0
  • 0

Escriu un comentari sus aqueste article