Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc NautLauragués

Perfum inquisitorial a Sant Pàpol

Lo concèrt del festenal Los Trobadors Cantan l’Art Romanic, fòrabandit de l’abadiá

Gharbaïn
Gharbaïn
Suspresa pels espectators del concèrt previst dimenge 9 d’agost a Sant Pàpol dins l’encastre del festenal Los Trobadors Cantan l’Art Romanic. Se tendriá pas coma previst a l’abadiá, mas dins la sala de las fèstas del vilatge, çò rapòrta La Dépêche.
 
La comission liturgica de la parròquia de Castèlnòu d’Arri èra opausada a una tala manifestacion. E ne faguèron part als organizaires. Èra pas tant la preséncia dels dos poètas occitans (Franc Bardòu e Jaumes Privat) que los geinava, mas aquela del grop Gharbaïn (los dos Oèst: Marròc e l’Andalosia medievala del temps medieval)
 
Es una primièra interdiccion pel festenal que presenta d’espectacles dins plan de glèisas e abadiás romanicas de Lengadòc e Rosselhon dempuèi d’ans e d’ans. Ongan: la Grassa, Fontfreja, Fontcauda, Valmanha, Vilalonga (Sant Martin lo Vièlh), Sant Guilhèm, Sèrrabona, Marcevol, catedrala de Mende...).
 
Aqueste dissabte 15 d’agost, l’abadiá programava un festenal de rire e de patrimòni amb de musicaires e de circ. Notarem que los artistas foguèron pas escomenjats coma un còp èra!
 
Una question grèva, tocant la libertat d’expression, es de véser aqueste biais de censura culturala passar coma se res non èra e sens cap de protèsta bèla. Ont son passats los esperits d’Al Andalós e de Convivéncia?
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc BARDÒU
4.

Çò que non precisissètz, es que la comuna de Sant Pàpol nos a obèrta la "sala de las fèstas". Lo public, pro nombrós e plan atentiu, i es estat aculhit. Lo cónsol a indicat que los musicians èran planvenguts (e tanben los poètas occitans). Gerard Zuchetto, director del festenal, informèt la sala indignada qu'èra lo primièr còp qu'aquò arribava, dempèi sa creacion, " mas que voliá pas poemicar " en qualitat de director e d'organizator. Atal faguèt lo cónsol tanben. Quora me foguèt donada la paraula, per presentar nòstra intervencion a dos, lo grand Jaumes Privat e ieu, indiquèri ieu que nos trobavem nas a nas de racisme, que non me geinariá brica de polemicar amb una glèisa atal (que se pretend crestiana mas que fa çò que fa — se reconeis un arbre a sas frutas), e qu'èri plan fièr d'èsser fotut a la pòrta d'una glèisa atal als costats dels nòstres amics narboneses del grop Gharbaïn. Una glèisa atal, i ai pas res a i far dedins, se que non de torisme.

Lo programa musical e poetic del grop nos donèt a escotar musica classica andalosa, mas tanben musica tradicionala berbèra, sus de poèmas que lo contengut i èra pro vesin, dins son fons, del grand cant cortés occitan. Lo public ne foguèt estrambordat e plan calorós. Quora ne discutiguèri, dins la clastra romanica, après l'espectacle, a l'entorn d'un veirat de la fraternitat que nos oferissiá la comuna, lo menaire del grop parlèt amb ieu en occitan. La fraternitat estajava dins la nòstra lenga.

  • 7
  • 0
Guilhèm Thomàs Tolosa
3.

Vergonha !

  • 1
  • 0
Francesc Palma de Mallorca
2.

Es una bona idea far un festival dedicat als trobadors, sai pas a qui pot pas agradar, potser no està ben elegit lo grop àrab, pot ser sia milhor que cantin dins un altre loc. Mas cal seguir amb sa musica trobadoresca e investigar coma sonava, se hi havia molt de platets, panders, xeremiers, bulhici, dançaires,o era mai tranquil·la la causa, segurament hi havia per tots los gusts e tamben per dançar amb moviments desconeguts, o potser atlibitum cadescún a son aire, fent los moviments coma ara a las discotecas.

  • 1
  • 3
GERARD TAUTIL SIGNA - Var
1.

Aquel eveniment a de flairors inquisitorialas per nautrei, segur, mai pudis lo colonialisme tradicionau francés, enfortit per la situacion politica e la question de l'immigracion.

A beis uelhs vesents, aqueste monde es en simpatia ambé lo FN.

Se denegacion l'avia, direm qu' aquela manifestacion es ben dins l'èr dau temps...

E se l'a una gleisa progressista es a ela de se far ausir...

Capelada ais intervenents de la cultura mediterranenca e occitana !

Amistat
G.Tautil

  • 3
  • 0

Escriu un comentari sus aqueste article