Bandièra01 1180x150: Comuna de Tolosa

Actualitats

Segonda assemblada de legeires de Jornalet

Una de las conclusions mai importantas de la reünion es l’importància d’aqueste jornal coma aisina a l’escòla

Aperaquí vint e cinc personas participèron ièr a la segonda assemblada de legeires de Jornalet. La reünion se debanèt dins l’encastre de l’Escòla Occitana d’Estiu (EOE) e aquí, lo capredactor del jornal, Ferriòl Macip, expausèt lo foncionament del jornal. Atanben presentèt l’associacion ADÒC, de drech espanhòl, que fa possible aqueste jornal, e l’associacion los Amics del Jornalet, de drech francés, que sosten lo projècte. Macip respondèt a qualques questions e escotèt totas las opinions e proposicions dels participants, que s’aplicaràn puèi dins las nòstras possibilitats.
 
En mai de sosténer l’idèa d’introduire una seccion d’istòria, suggerida ja dins l’assemblada de legeires precedenta celebrada a Rodés en julhet, se prepausèt un molon d’idèas per far avançar aqueste jornal en linha. Una de las conclusions mai importantas de la reünion es l’importància d’aqueste jornal coma aisina a l’escòla e al licèu, ont jòga un ròtle de “vector essencial de transmission de la lenga”. Dins aquel sens tornam encoratjar los escolans e los professors de las escòlas occitanas (publicas o associativas) per que nos manden de nòvas sus lors activitats, amb de fòtos, de vidèos o d’àudios. Se remarquèt qu’es bon per la lenga que los escolans e las lors familhas ajan costuma d’escriure e legir en occitan endacòm mai; l’occitan es pas solament una causa de l’escòla, maitot es una lenga viva.
 
Se prepausèt tanben de far de prèmis e concorses amb la participacion dels legeires; d’encoratjar lo mond a raportar de nòvas localas per promòure los divèrses païses occitans; d’inserir d’autras nòvas idèas dins los contenguts d’actualitat; e quitament de crear una seccion amb de ressorsas per l’intercompreneson entre catalanofòns e occitanofòns. Se prepausèt tanben d’editar un document de papièr amb las informacions e opinions mai legidas o mai comentadas.
 
 
Fèsta del quatren anniversari a Narbona
 
Per festejar en abril que ven lo quatren anniversari de Jornalet, se farà una fèsta a l’Ostal d’Occitània de Narbona.
 
 
De presentacions pertot
 
Après aquelas doas assembladas de legeires, s’organizarà de presentacions de Jornalet per tota Occitània. Se cresètz que se poiriá organizar una presentacion dins la vòstra vila o lo vòstre vilatge, escrivètz-nos a info@....
 
Sèm conscients que lo prètzfach es grand e las ressorsas son escarsas, mas esperam de rompre los clichats e los complèxes amb l’ajuda de totes. Sèm pas perfièches e es plan segur que fasèm d’errors. Esperam alavetz que nos ajudaretz a nos melhorar amb los vòstres comentaris, criticas e contribucions. Fasètz-vos vòstre lo Jornalet perque lo Jornalet es de totes.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

gilós pietadós
8.

#7 tot es dit. jornalet es un utís de difusion d'aran.

  • 1
  • 0
Tònho Vilamòs
7.

Aguest projècte enterpresariau qu’ei Jornalet contribuís sense dobte a mantier actiui e informadi as aranesi de dehòra. Ei un nautparlaire diari d’Aran. N’auem de besonh enta difóner un país gran en contenguts e limitat en territori.
En aguest sens Jornalet ei un eficaç element de difusion d’Aran. Treiguent quauques excepcions no ei pas facil de trobar contenguts informatius e d’opinion damb frequéncia diària sus eth nòste país ena premsa.
Sò conscient dera dificultat e eth merit qu’a eth trèir endauant un projècte de comunicacion coma Jornalet, non ja des deth punt de vista de diari, ara vista ei eth bon resultat, mès des deth punt de vista enterpresariau e econòmic.
Jornalet mos permet cada maitin contactar damb Aran. Entà fòrça de nosati er exercici de bon maitin de connectar-se a Jornaletena “tauleta” ei coma daurir era lucana dera cramba, possar es contravents, guardar coma ges eth dia en Aran e dar ua oelhada cap ara Maladeta enta endonviar a trauès des bromalhs s’auràm nhèu o bon temps. Per açò participi actiuaments e de bon grat, ath delà de coma lector impenitent en fòrum qu’ei Jornalet entà promòir tot çò d’aranés.

  • 6
  • 1
Gerard Joan Barceló Pèiralata
6.

#3 Non pas, vòstra critica es constructiva e doncas d'a fons benvenguda, çò'm par.

Totun, la question economica se pòt pas negligir: las ressorsas de Jornalet son fragilas e, malgrat lo trabalh enòrme de Ferriòl Macip Bonet (vos grandmercegi de còr de o aver reconegut publicament), encara li es pas possible de ne viure.

  • 4
  • 0
Reinat Matalòt NIÇA
5.

Jornalet a lo meriti d'existir, es ja una avançada. Tot si pòu melhorar, basta de n'aver la volontat. Contunhatz.
Viva !

  • 7
  • 0
romegaire gilós e pietadós
4.

pasmens, mercés a Farri totun !

  • 8
  • 0

Escriu un comentari sus aqueste article