Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc BasCarcassés

Cinc dijòus per l’escrit occitan

Lo 1r d’octòbre, Micheu Chapduelh serà lo convidat de marca dels Cinc Dijòus-Escritura
Lo 1r d’octòbre, Micheu Chapduelh serà lo convidat de marca dels Cinc Dijòus-Escritura
L’Institut d’Estudis Occitans d’Aude e lo Cercle Occitan del País de Carcassona vos convidan a una tièra de rendètz-vos, los Cinc Dijòus, jol signe de l’Escritura, en fin de vèspre (18h30) a l’Ostal Sirventés (79, la Trivala).
 
De temps, Escritura se tenguèt un dimenge a Montoliu, lo Vilatge del Libre d’Aude. Mas las condicions de crompa dels libres occitans (e d’autres, tanben) an cambiat e, en consequéncia, lo format d’Escritura tanben. Los cinc rescontres prepausats abòrdan l’escrit occitan de cinc biaisses diferents: creacion, estudis, etnologia, revirada, cosina...
 
E un, e dos, e tres, e quatre, e cinc!
 
— Atal, lo primièr rendètz-vos (lo dijòus 3 de setembre) mesclarà las Musas (presentacion dels trabalhs del Grop Aqüarèla del Cercle Occitan) e la signatura per Mirèlha Braç de son obratge culinari Afogassets e trufariás (editat per Letras d’Òc).
 
—  Lo dijòus 10 de setembre, Ròsa Blin-Mioch parlara de la felibressa roja Lidia de Ricard (1850-1880) qu’escambièt una brava correspondéncia amb August Forés.
 
—  Lo dijòus 17 de setembre, Felip Calàs presentarà las fèstas tradicionalas o novèlas en Lengadòc e en Catalonha Nòrd al fil de l’an en s’apiejant sus son obratge Fèstas d’Òc (CS-Prod).
 
— Lo dijòus 24 de setembre, Sèrgi Gairal parlarà de Dòn Quishòt, l’eròi legendari nascut jos la pluma de Cervantes que ven de ne revirar una partida en occitan (IEO Edicions).
 
— Lo dijòus 1r d’octòbre, l’escrivan (mas tanben contaire e etnològ) de Peiregòrd Micheu Chapduelh http://ieo-lemosin.org/?intervenant=michel-chadeuil&lang=fr serà lo convidat de marca de l’Ostal Sirventés.
 
E es pas lo tot...
 
A aqueles cinc moments, cal ajustar la jornada pòrtas dobèrtas de l’Ostal Sirventés lo dimenge 6 de setembre a l’escasença de la Fièra dels Trastes de la Trivala. Sèrgi Gairal e Micheu Chapduelh rescontraràn los escolans de la Calandreta de Ciutat. E mai, Micheu Chapduelh animarà una serada de contes lo divendres 2 d’octòbre en Val de Danha e serà un dels intervenents de la jornada 2015 dels Companhs de Paratge (dissabte 3 d’octòbre, a Montlaur) sul tèma de las bruèissas, dels bruèisses e dels sortilègis.
 
Qualques lecturas en francés (Valérie Schlée) e occitan (Alan Roch) se debanaràn tanben a la librariá del centre vila Mots & Compagnie http://librairie.motsetcie.over-blog.com (divendres 11 de setembre, a 19 h: Du Languedoc e en lenga d’òc; dissabte 10 d’octobre, a 10h30: Joan-Enric Fabre, entomològ e felibre).
 
Aquò vos balharà plan d’idèas per legir d’òbras occitanas e benlèu per venir escrivan o escrivana d’òc!
 
 
 
 
IEO Aude

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

IEO-Aude Carcassona
2.

Modificacion al programa :
lo dijòus 17 de setembre, La Sauze presentarà son recuèlh de tèxtes Cançons en Òc.
(Intervencion de F. Calàs remesa a febrièr de 2016, en principi).

  • 0
  • 0
Pirolet
1.

Fa temps, se pantaissava de la setmana dels 4 dijòus per la canha. Ara sèm a fargar los mes dels 5 dijòus... per la lenga. Òsca!

  • 3
  • 0

Escriu un comentari sus aqueste article