Bandièra01 1180x150: Comuna de Tolosa

Actualitats

L’estat francés aculhirà 24 000 refugiats dins los dos ans venents

En Occitània fòrça comunas se prepausan per aculhir de refugiats

| Présidence de la République - C.ALIX/J.BONET
“França es dispausada a prene sa part, aculhirem 24 000 personas. O farem”, çò anoncièt lo president francés François Hollande dins sa conferéncia de premsa semestrala. Lo nombre de refugiats que l’estat aculhirà coïncidís amb la quòta que la Comission Europèa a prepausat per partejar los 120 000 refugiats previstes dins l’ensemble de l’Union Europèa, dins lo dich “mecanisme permanent obligatòri” que Berlin e París an prepausat.
 
Al delà, Hollande a prepausat de celebrar una conferéncia internacionala suls refugiats a París e a criticat los estats de l’Euròpa de l’Èst qu’an refusat d’aculhir de refugiats. “Qu’aurián pensat aqueles païses se, fa 30 ans, al moment de la casuda del Mur de Berlin, òm auriá dich «non, pas tot sus lo còp, prenètz lo vòstre temps, restatz on sètz»? Non, lor diguèrem «venètz, sètz d’europèus, anem bastir l’Union»”, Çò rapòrta Libération.
 
L’estat espanhòl tanben refusa d’aculhir de refugiats, qu’accèpta pas que las quòtas sián obligatòrias. Pasmens, segon Catalunya Press, deman Brussèlas demandarà al govèrn espanhòl qu’Espanha aculhisca 14 931 refugiats.
 
De son costat, lo govèrn de la Generalitat de Catalonha se prepausa per aculhir 2000 refugiats, e las comunas de fòrça vilas dels Païses Catalans e de tot l’estat espanhòl an seguit l’iniciativa de la comuna de Barcelona, de se declarar vilas d’aculhida pels refugiats.
 
 
En Occitània
 
En Occitània tanben i a de comunas que se prepausan per aculhir de refugiats. Al delà del Vigan (Cevenas), la lista s’es alongada a onze vilas de l’entorn de Tolosa: Saubens, la Barta de Lesa, Pins e Justaret, Ròcas, Pinçaguèl, Èunas, Vilata, Ramonvila, Roquetas, la Gardèla de Lesa, Portèth de Garona.
 
La capitala d’Auvèrnhe, Clarmont-Ferrand, a anonciat qu’albergarà fins a 200 familhas dins la region.
 
En Peiregòrd, lo conselh departamental de Dordonha a anonciat qu’ajudarà financièrament las comunas qu’accèpten de refugiats.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

lo canonge de misericordia
2.

24 000 multiplicats per dètz, multiplicats per cènt... quotàs o pas quotàs, lei frontieras son dubèrtas, leis ondadas migratòrias fan que començar e lo paire curd d'aqueu malurós enfant negat que sa fotò a esmòugut lo monde, eu, acusa pas l'Euròpa, de ges de maniera, mai d'estats coma leis emirats, lo Qatar, l'Arabia saodita, fraires de lenga e de religion de nonanta per cent dei refugiats que tenon sei frontieras barradas e aculhon degun de Siria o d'Iraq. dins quinze jorns, l'emocion sarà tombada e lo problèma agreujat ! Preguem lo dieu dei jusius e la trinitat politeïsta crestiana que sostenguèsson lei curs lei solets valents que combaton de bon Daesh e que la Turquia ipocrit e islamista d'Erdogan vòu escrachar

  • 4
  • 7
Pirolet
1.

Chut! o cal pas dire que lo temps de las grandas migracions es arribat! 24 000 sembla un pauc cortet mas cal pas esfariar los estruces que anaràn votar!

  • 0
  • 0

Escriu un comentari sus aqueste article