Bandièra01 1180x150: Comuna de Tolosa

Actualitats

Rugbi XIII: Dieu-o-vòl magic a Brutus

Dracs-Leeds  la jòia d’Inu, Escarré (d’esquina), Dureau e Carney (d’esquèrra a dreita)
Dracs-Leeds la jòia d’Inu, Escarré (d’esquina), Dureau e Carney (d’esquèrra a dreita) | Dragons Catalans

Una dimenjada tretzista a ne venir fòl: las pelhòfas en Austràlia, la darrièra partida dels Dracs a Brutus per la sason e la represa dels campionats d’Elèit aicí. Anam ensajar de vos resumir tot aquò!


Los Superdracs estrambòrdan Brutus
 
Per lor darrièra aparicion sus lor pelena, los Dracs recebián lo cap de fila Leeds. Sul terren, èran presents Scott Dureau, Eliott Whitehead, Ian Henderson, Zeb Taïa e Ben Garcia que prendràn la direccion d’Austràlia per la sason venenta. Lo grand balèti dels adieu-siatz...
 
Lo public foguèt pas decebut que lo Rinocèros foguèt transformat en un pòni manhaguet mercé a un Todd Carney sobeiran a la manòbra, qu’aqueste balhèt lo tempo a una formacion aganida de palma e d’espaci. Los ensages venguèron en cordelada: Tomas Bòsc bonificava una intercepcion de Dureau, Inu sautava mai naut sus una passa al pè de Carney e lo meteis Carney fasiá l’anguila per anar puntar: 18-0 a la pausa. Dins lo segond temps, la sardana s’endiablèt, s’embrueissèt encara mai: Bòsc puntava dins lo recanton, Inu tornava sautar mai naut que la defensa anglesa, Sigismeau s’escapava sus 80 mètres. S’a 32-0 los angleses trapavan enfin un trauc dins la defensa catalana, Lima i anava d’un ensag en fòrça e Whitehead menava al pè la palma sus 30 mètres per s’amorrar entre los pals. Los Rinocèros finiguèron que se desvelhèron, mas èra talament tard: 46-16. Lo public se lancèt dins una òla! (cal pas doblidar l’accent, per çò que dins l’ola, fa de temps que lo rinocèros marinava!), e demorèt un long temps un còp la còrna passada per aplaudir e sustot saludar los cinc partents. Lo regrèt demòra de se demandar cossí los Dracs foguèron pas en capacitat de jogar a un tal nivèl, amb una tala volontat e solidaritat, long de l’an. Mas amb de se, fa temps que Catalonha seriá independenta! Ara, demòran dos desplaçaments: dissabte a Warrington e dins una quinzenada a Hull FC, contra los adversaris dirèctes per la seisena plaça. Alara, benlèu que sus la lançada...
 
La victòria d’Huddersfield sus Warrington, 48-10, permet justament als Dracs de ragantar los Lops. Dijòus, St. Helens levèt las darrièras illusions de qualificacion a Castleford, 42-38, e divendres, Wigan arribèt de mestrejar la resisténcia d’Hull FC 30-24 per ragantar Leeds en cap de classament.
 
 
Tempèsta en Austràlia
 
En NRL, se jogava lo primièr torn de las Finals-Series. Sus sa pelena, los primièrs, los Poletons de Sydney, se faguèron susprene pels quatrens: la Tempèsta de Melbourne 20-18 e los Cavals Fòls de Brisbane batèron sul fil los Vaquièrs 16-12.
 
Dins lo bas del tablèu, los Lapinons totalament endormits e sens èime daissèron lor trofèu fàcia a las Làmias de Cronulla sens pietat, 28-12, mentre que calguèt lo punt d’aur per qualificar los Dògols contra los Dragons de Sant Jòrdi: 11-10.
 
Se Melbourne e Brisbane son ja en mièjas finalas, aquesta setmana los barratges opausaràn dijòus los Poletons e los Dògols e dissabte los Vaquièrs e las Làmias; petaçatz-vos per trapar los oraris de difusion sus Be In Sport: vos anatz regalar!
 
 
Lesinhan e Carcassona frapan
 
Dissabte, Dragonets e Albi joguèron la primièra partida de la sason del campionat d’Elèit 1 en dobertura dels Dracs. Lo novèl vengut perdèt 26-18, mas mostrèt que s’acontentariá pas de faire de figuracion; Limós coneguèt de dificultats per ganhar a Avinhon: 20-16.
 
Dimenge, Lesinhan s’impausèt aisidament als Broncos de Tolosa, 40-4, mentre que l’AE Carcassona preniá lo pas sus Palau: 40-8.
 
Dissabte, Vilanuèva, rassegurada pel jutjament que li evita una liquidacion judiciària, jogarà a Albi, e Tolosa recebrà los Dragonets dins l’afrontament entre las doas resèrvas d’esquipas engatjadas en Anglatèrra. Dimenge, Lesinhan anarà a Palau mentre que l’estadi de l’Agulha recebrà lo primièr dèrbi de l’an: Limós-AE Carcassona.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
2.

.. e Warrington-Dracs en diferat dissabte als er (22h45, sus BeInSport-3).

  • 1
  • 0
Alan Roch Carcassona
1.

• Per Poletons-Dògols, es dijòus a 10 h del matin sus BeInSport3

• Vòli plan que « Sportive » se digue « Esportiva » en occitan, mas me vesi pas parlar de l'AEC a Carcassona en plaça de l'ASC !!!!!

  • 1
  • 0

Escriu un comentari sus aqueste article