Fins a la còrna a Limós
 
Dimenge, jol solelh estivenc, lo public aviá respondut a l’aficha totjorn recomençada: Limós-Associacion Esportiva Carcassona XIII. Los locals dobrissián la marca per un ensag de Migaud mes sus orbita pel menaire de jòc Murcià, que sa retirada de las pelenas del mes de mai durèt del temps de l’aperitiu d’adieu! Mas mercé a dos ensages de Sobeiràs e un de Pau, amb 2 transformacions, los vesitaires menavan 16-6 a la pausa. Los Limosencs tornavan determinats sus la pelena e ajustavan tres ensages (Puso un còp e Martins dos còps), una transformacion e doas penalitats (Murcià) per menar 24-16. Al mai fòrt de la dominacion locala, sus intercepcion, Sobeiràs signava son tresen ensag de la vesprada e l’Associacion Esportiva Carcassona XIII tornava a 24-22. Limós se multiplicava en defensa, Carcassona trapava pas lo trauc e Murcià i anava de son tombat tradicional a la 77a minuta: 25-22 pels locals. L’Associacion Esportiva Carcassona XIII recuparava la pauma sus l’engatjament, Pau anava darrièr la linha, mas l’arbitre estimava qu’aviá pas puntat. Demorava una punhada de segondas de jogar quand, dins los 20 mètres locals, sus un tampon canari desesperat, lo dobertura limosenc Borrèl daissava escapar la palma que lo mesclanha carcassonés Borrèl bonificava en un ensag de la victòria 26-25 que deslargava los crits estrambordats dels sostens e fasiá calar en un res de temps los “Cuí-cuí-cuí, los Canaris son cuèits!” locals.
 
D’aquel temps, Lesinhan se passejava a Palau: 48-14.
 
Dissabte, Vilanuèva, amb un budget estequit e un grop jove, comprenguèt que se preparava a un camin de crotz entamenat a Albi: desfaita 46-10. Los Dragonets anavan batre los Broncos de Tolosa dins la partida de las formacions-resèrvas: 24-16.
 
Pel compte de la tresena jornada, doas partidas son al programa dissabte 26: Avinhon-Albi (17h), Vilanuèva-Tolosa (20h) e doas oposicions entre audencs e catalans per dimenge (15h30): Palau-Limós e Dragonets-Lesinhan a Sant Estève.
 
 
Superliga: rer qual las mièjas finalas a domicili?
 
Los Dracs aiman pas brica los viatges. N’avèm una novèla e trista demostracion. Aprèp la partida embriaganta contra Leeds, dur retorn a la realitat cò dels Lops de Warrington: 26-0 a la pausa e 46-6 al final. Carney èra tornarmai absent e Pelissièr suspendut en intèrne per aver declarat a la premsa que jogava pas pro. Anem, encara un esfòrç: la setena plaça serà lo sol enjòc del desplaçament de dimenge contra l’Hull FC.
 
En cap de classament, aprèp una novèla desfaita de Leeds sus sa pelena fàcia a Castleford (29-22), la victòria d’Huddersfield a Hull, 34-20, e la de Saint Helens sus Wigan, 18-14, las posicions dels quatre qualificats per las mièjas finalas son aquestas:
  Aquò vòl dire que la darrièra jornada serà decisiva per saupre qual recebrà per las mièjas finalas: tre dijòus, Saint Helens recebrà Warrington; puèi, divendres, mentre que Wigan recebrà Castleford, los Gigants e los Rinocèros seràn a las presas sul terren d’Huddersfield.
 
 
NRL: la banda dels quatre en mièjas finalas
 
En Austràlia, las doas partidas de barratge an virat a la demostracion de las doas formacions del naut del tablèu. Atal, los Roosters-Poletons (primièrs del classament) an batut divendres los Dògols, 38-12, mentre que dissabte, los Vaquièrs (tresens), menats pel Jonathan Thurston designat jogaire de l’an pel tresen còp, an dominat las Làmias de Cronulla: 39-0.
 
Tornam trapar doncas en mièjas finalas los quatre primièrs de la primièra fasa. En mièja finala, a Brisbane, s’opausaràn Poletons e Cavals Fòls de Brisbane, divendres (11h55, ora occitana, sus Be In Sport 1); puèi, la Tempèsta de Melbourne recebrà los Vaquièrs, dissabte (11h45, ora occitana, sus Be In Sport-Max 4).
 
 
 
 
Alan Roch