L’annada de Leeds
 
“Sold out”: pas mai una plaça a vendre dissabte per dintrar a Old Trafòd e per seguir la finala de Superliga entre Leeds e Wigan: mai de 75 000 espectators presents que foguèron pas decebuts per l’espectacle. Wigan marquèt en primièr per Joe Burgess (3a, transformacion Bowen), mas Leeds repliquèt per McGuire (6a, transformacion de Sinfield) e ajustèt dos ensages abans la pausa (Moon a la 26a; puèi Mac Guire tornar e transformat per Sinfield,  35a) per arribar a 16-6 a la pausa.
 
A la represa, Wigan tornava prene l’avantatge en tres minutas amb dos ensages transformats per Bowen: Manfredi (45a) e Bowen el meteis tal una sèrp (48a). Lo tustaire ajustava una penalitat a l’ora de jòc, mas sus la recuperacion d’una candela, Josh Walters (63a) puntava l’ensag que Sinfield transformava: 22-20. Wigan, al cap de sas fòrças e de sos arguments, deguèt daissar lo trofèu a Leeds qu’ongan se ganhèt tanben la Cup e acabèt primièr al classament. Kevin Sinfield s’es plan ameritat la retirada (signatura al club de XV de Leeds), coma Peacock que serà l’an que ven director esportiu d’Hull KR.
 
Leeds recebrà lo 21 de febrièr los Vaquièrs de Nòrd Queensland pel trofèu de campion del Mond dels clubs. L’afrontament valdrà lo còp!
 
 
Carton plen audenc
 
En Elèit 1, dissabte, Lesinhan s’es envolat dins lo segond temps a Avinhon: 40-4, mentre que Carcassona ganhava aisidament contra los Tolosa-Broncos: 62-0. Los Dragonets esperavan la fin de partida per s’impausar a Vilanuèva 38-20. Dimenge, Limós completava lo carton plen audenc amb una victòria sus Albi: 36-20. Lo dèrbi del 25 d’octòbre, al Molin, entre Lesinhan e Carcassona, opausarà doas formacions qu’an pas encara conegut la desfaita.
 
 
Plaça al campionat europèu
 
Pel compte del Campionat Europèu, lo XIII de França recebrà aqueste dissabte de vèspre a Albi l’esquipa d’Irlanda. Lo grop dels Blaus es en fasa de preparacion per la Copa del Mond de 2017. Los afogats espèran una resulta positiva.
 
 
 
 
Alan Roch