Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'AranPujòlo

Naut Aran: Endesa a metut en plaça un interruptor telecomandat en ua linha electrica

Atau se poderà restablir eth servici electric de manèra remòta en cas d’incidéncia

Arties (Val d'Aran)
Arties (Val d'Aran) | Isidre Blanc
Era societat electrica Endesa a finalizat es trabalhs de renovacion tecnologica deth hilat electric deth municipi deth Naut Aran (Val d’Aran) damb era tòca de refortir eth servici. Era companhia a installat un interruptor telecomandat ath hilat que permet de restablir eth liurament de manèra remòta e immediata en cas d’incidéncia. Concretaments, era companhia ei intervenguda en ua linha de mieja tension de 15 quilomètres. Aquera accion, qu’a requerit un investiment d’11 200 èuros e qu’ei realizada integrauments pera societat, implique un melhorament ena qualitat e era continuitat deth liurament electric en Naut Aran; e que benefície, de manèra mès dirècta, as clients deth nuclèu d’Arties.
 
Ara diferéncia deth sistèma anterior, aguest interruptor ei encapsulat, çò que redusís eth besonh de mantenença e melhore substanciauments era seguretat gràcies ara sua nauta estabilitat termica e quimica. Endesa a profeitat d’aquera accion entà cambiar es isolaments convencionaus deth supòrt per d’auti de tipe polimeric, fabricadi a partir d’un compausat a basa de fibra de veire e de silicòna e que pòrten avantatges significatius a respècte des anteriors. En concret an un pes mès leugèr e ua resisténcia mès grana as incleméncies meteorologiques coma era granissa, es pèires o es descargues de pericles; o eth vandalisme, coma es còps de huec des caçaires. Damb aquera intervencion, era companhia Endesa trabalhe pera mantenença e eth melhorament tecnologic des sues installacions e infrastructures e garentís ua melhora qualitat e continuitat deth liurament electric as clients deth Naut Aran.
 
 
 
 
Vilaweb/FM

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article