Bandièra01 1180x150: Comuna de Tolosa

Actualitats

Fin finala an liberat Jabier Salutregi, lo sol director d’un jornal d’Euròpa qu’es estat empresonat

“Barrar un jornal dins quin estat que siá de l’UE es quitament pas una ipotèsi dins l’esperit dels ciutadans europèus, mas si que n’es una dins lo d’un espanhòl”, çò diguèt

Après sèt ans e mièg en essent embarrat, en divèrsas fasas, lo jornalista basco Jabier Salutregi sortiguèt ièr, fin finala, de la preson de Burgos (Espanha). Salutregi, director del jornal Egin, es lo sol director d’un jornal d’Euròpa qu’es estat empresonat, coma o soslinhèron ben los de Reportès sens Frontièras. Son periple judiciari comencèt l’estiu de 1998, pendent lo primièr mandat de l’èx-president espanhòl José María Aznar (PP), quand la polícia barrèt Egin, lo jornal qu’el dirigissiá e que se publicava dempuèi 1977. Après setze meses d’un macrojutjament a Madrid, Salutregi deguèt complir sèt ans e mièg de preson en tres fasas, que s’acabèron ièr amb sa sortida en libertat.
 
Dins una entrevista recenta a la revista Vice, Salutregi remembrava que foguèt lo jutge de l’Audiéncia Espanhòla, Baltasar Garzón, que foguèt encargat d’activar la dicha “operacion Persiana” contra los organismes e las entrepresas presumidament ligadas a ÈTA: “barrar un jornal dins quin estat que siá de l’UE es quitament pas una ipotèsi dins l’esperit dels ciutadans europèus, mas si que n’es una dins lo d’un espanhòl”, çò disiá.
 
Parlèt tanben amb Al Jazira, en mai passat, dins un vast reportatge sus la repression de l’estat espanhòl contra los mèdias bascos. De fach, la repression anèt fòrça mai al delà. La polícia espanhòla barrèt en 2001 la revista Ardi Beltza e en 2003 lo jornal de lenga basca Egunkaria.
 
 
Dos condemnats contunharàn de complir de penas de preson
 
Dins lo meteis jutjament contra Egin foguèron condemnats a la preson Jesus Mari Zalakain, José Luis Elkoro amb los fraires Murga, Pablo Gorostiaga amb Manu Intxauspe, ja liberats, en mai dels jornalistas Karlos Trenor e Joxean Etxeberria, que complisson encara lor condemna. 



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Buai
3.

España, un país... Formidable !

  • 2
  • 0
Pirolet
2.

E es pas acabat. N'anam veire de pus gròssas amb la que nos preparan lo PP amb Ciudadanos e lo TSOE (coma disiá Carrillo). Mentretant, dins los medias franceses devon esperar que los carris dintren dins Barcelona per s'entrevar e, sens mai d'informacion, o traparàn normal.

  • 4
  • 0
Joan Francés Blanc
1.

Cap apondre que totas las acusacions contra Egin tombèron en 2009, mas En Jabier foguèt pasmens engabiat. Espanha es pas un "estat de drech".

  • 7
  • 0

Escriu un comentari sus aqueste article