Fa ja 25 ans qu’occitans e catalans se retròban lo primièr dimenge d’agost en la tradicionala pojada al pòrt de Salau, a 2100 mètres de nautada. Los occitans sortisson de Salau (Coseran) e los catalans de la vila catalana d’Esterri d’Àneu. L’amassada es venguda un simbòl d’amistat e de revendicacion nacionala dels dos pòbles vesins.

L’amassada, organizada pel Comitat d’Afrairament Occitanocatalan (CAÒC), faguèt ongan un omenatge a Enric Garriga Trullols, que moriguèt en novembre passat. Garriga Trullols es estat un dels principals promotors de las relacions occitanocatalanas; sul pòrt s’i placèt una placa en remembre sieu.
 
Coma totjorn, se faguèt d’actes d’afrairament, d’escambis de produches dels dos terraires, de danças tradicionalas, de discorses de benvenguda, e fin finala s’issèt las bandièras occitana e catalana del temps que lo mond cantavan Se Canta e Els Segadors.
 
L’emplaçament d’aquel pòrt es simbolic: s’agís d’un camin natural entre Occitània e Catalonha, qu’a servit istoricament per connectar los dos pòbles.
 
Per arribar al pòrt, als occitans lor cal caminar tres oras del temps que los catalans sonque marchan 45 minutas. Es per aquò que tradicionalment los occitans pòrtan lo formatge e los catalans i menan lo vin.