Bandièra01 1180x150: Comuna de Tolosa

Actualitats

Son a far una adaptacion musicala de l’òbra poetica de Leon Còrdas

Lo Collectiu Còp Sec a lançat una campanha de micromecenatge per menar a tèrme aquel grand projècte de dignificacion de l’escrivan vinhairon de Menerbés

Se lança l’enregistrament e l’edicion d’un disc portant sus l’òbra poetica de Leon Còrdas (1913-1987), lo poèta vinhairon de Menerbés que donèt a la nòstra cultura una creacion literària plan vasta dins son engatjament per la transmission de l’occitan coma lenga viva. Lo projècte, lançat pel Collectiu Còp Sec, permetrà de metre en valor l’òbra del poèta e de las creacions musicalas que sos poèmas n’an fach l’objècte.
 
Per o realizar, s’es lançada una campanha de micromecenatge sus Ulule, qu’amassarà una partida de l’argent. L’autra deu venir d’una subvencion del conselh regional de Lengadòc-Rosselhon e dels fonzes de la pròpria associacion. Amb tot aquò, lo Collectiu Còp Sec garentís una produccion dins de condicions professionalas de qualitat.
 
Lo projècte es integrat dins l’accion del CIRDÒC per metre en valor l’òbra de Còrdas. Pendent l’an 2015 òm a trabalhat a la seleccion de poèmas e a d’enregistraments de maquetas. A l’ora d’ara son a far los enregistraments dels títols e, après lo mixatge e la masterizacion, la sortida de l’album es prevista per lo començament de 2016.
 
Rèstan 31 jorns per que s’acabe la campanha sus Ulule e lo collectiu amassa ja près del 30% de l’argent necite. Pasmens, cal ajudar e far possible entre totes aquel projècte de dignificacion del grand escrivan vinhairon de Menerbés.
 

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Aquela mena de finançament es un biais per mostrar que sèm encara vius. Cal butar a la ròda que, aquò, los presicaires jacobins o an pas previst.

  • 1
  • 0

Escriu un comentari sus aqueste article